Социјалното претприемништво зема голем замав во Европа и светот, како алатка за решавање на најгорливите социјални проблеми – невработеност, сиромаштија, ексклузивноста на општеството… Во Македонија младинската организација „Младински сојуз“ од Крушево, како носител, а во соработка со партнерски организации од повеќе земји, го спроведува проектот „Dive in Social Entrepreneurship” („Нурни во социјалното претприемништво”).
Иницијалниот состанок за проектот се одржа во Скопје, од 15 до 18 декември, 2016, а досега, во рамките на проектот се реализирани повеќе активности. Во рамките на проектот е реализирано и национално истражување преку он-лајн прашалници, фокус-група и длабински интервјуа, чија цела беше да се согледаат условите во Македонија за развивање на социјалното претприемништво, пречките и предизвиците со кои се соочуваат потенцијалните социјални претприемачи, како и условите за меѓусекторска соработка, за понатамошно развивање на концептот. Резултатите од истражувањата беа презентирани на интернационален семинар во Иаши, Романија, од 16 до 22 февруари 2017 , каде учесниците од партнерските организации дискутираа за условите за развој на социјалното претприемништво во државите каде функционираат.
Потоа се одржа тренинг-курс во Лерин, Грција од 17 до 25 март, кој се фокусираше на зајакнување на способностите на лицата кои работат со млади (младински работници, младински лидери), да реализираат висококвалитетни активности, кои ќе им овозможат на младите луѓе да ги зајакнат своите компетенции за отварање на сопствени социјални претпријатија.
Во следниот период ќе се организираат следните мобилни активности: тренинг курс во Измит, Турција, од 5 до 11 мај, 2017 година, студиска посета во Софија, Бугарија, од 12 до 19 јуни, и посети на трети земји во периодот јуни – септември, 2017 .
„DIVE in Social Entrepreneurship” е проект поддржан од Европската комисија, во рамките на програмата „Еразмус +“ за градење на капацитети во младинската сфера, преку соработка за размена на иновации и добри пракси.
Проектот ќе се реализира во период од 17 месеци и ќе вклучува партнери од Македонија, Бугарија, Турција, Грција, Романија, Бразил, Јужна Африка и Костарика.
Сотир Габелоски
