По разрешувањето на Марко Зврлевски, денеска е објавен огласот за именување нов државен јавен обвинител, со што и официјално почна да тече рокот од 15 дена за пријавување на заинтересираните кандидати за оваа функција.
Според агенцијата МЕТА, минатата недела, Собранието го изгласа распишувањето на огласот за именување нов државен јавен обвинител, а денешниот огласе потпишан од претседателот на Собранието, Талат Џафери
Во огласот е наведено: „Заинтересираните кандидати кои ги исполнуваат условите предвидени со членот 44, ставови 1 и 2 од Законот за јавно обвинителство (да е државјанин на Република Македонија, активно да го владее македонскиот јазик, да е работоспособен и да има општа здравствена способност, да има стекнато универзитетска диплома за дипломиран правник во Република Македонија или нострифицирана диплома од странство, да има положено правосуден испит во Република Македонија и да има работно искуство од најмалку осум години со потврдени резултати на правни работи по положениот правосуден испит, или редовен или вонреден универзитетски професор кој предавал повеќе од десет години правен предмет од правосудната практика), пријавите со потребните документи треба да ги поднесат до Собранието на Република Македонија, во рок од 15 дена од денот на објaвувањето на одлуката во ’Службен весник’“.
Засега, кандидатури најавија адвокатите Александар Тортевски, Звонко Давидовиќ, Александар Наков, Сејфула Османи и нотарката Лорија Ваневска.
Според Законот, по пријавувањето на кандидатите, Владата мора да поднесе барање за мислење до Советот на јавни обвинители, кое има обврзувачка улога, по што, Советот има рок од 15 дена, да даде позитивно или негативно мислење за сите пријавени кандидати. Потоа, до Собранието доставува предлог за именување јавен обвинител со кандидатите за кои Советот дал позитивно мислење.
Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.
За именувањето, како и за разрешување државен јавен обвинител, Собранието одлучува со просто мнозинство, односно со 61 глас.
[divide]
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.