ВЕСТ НА ДЕНОТ: Обезбедени се 62 потписи за Џафери повторно да биде претседател на Собранието
Собранието на Република Северна Македонија ја продолжи конститутивната седница сo претрес за предлогот за претседател на законодавниот дом повторно да биде избран Талат Џафери. Со 62 потписи на пратениците од СДСМ и Коалицијата „Можеме“, ДУИ и ДПА, Џафери е предложен за уште еден четиригодишен мандат за претседател на Собранието. Пратениците од ВМРО-ДПМНЕ и Левица во дебатата се изјаснија дека ќе гласаат против предлогот, а пратениците од Алијанса на Албанците и Алтернатива најавија дека нема да присуствуваат на гласањето.
Пратениците во моментов се на едночасовна пауза, а седницата ќе продолжи во 16 часот.
Бројот на потписите собрани за предлогот на Џафери укажува дека во Собранието има мнозинство по договорот на лидерите на СДСМ и ДУИ за формирање на владина коалиција. Претседателот на Собранието се избира со 61 глас „за“.
Предлогот за претседател на Собранието го образложи пратеникот Изет Меџити од ДУИ, кој кажа дека во минатиот период Џафери ефикасно и успешно раководел со законодавниот дом, согласно законите и Уставот. Тој, според Меџити, успешно ги менаџирал сите процеси од надлежност на Собранието.
ЦИВИЛНИ ВЕСТИ
Во рамките на Форумот за граѓанско учество во креирање на владините политики, ЦИВИЛ Медиа разговараше со активистката Мерсиха Смаиловиќ на тема национализам. Смаиловиќ се осврна на неколку аспекти на доживувањето на национализмот, и укажа на неколку штетни практики во политиката, но и во општеството што се однесува до поттикнување на национализмот.
ЦИВИЛ Медиа разговараше со заменик директорот на Јавното Сообраќајно Претпријатие, Блерим Исмаили, за улогата на јавниот превоз за зачувување на животната средина застапувањето на зелените вредности од ова јавно претпријатие. Исмаили се осврна на новите 33 еко автобуси коишто ги исполнуваат највисоките технолошки стандарди и кои беа пуштени во употреба минатиот месец.
Во текот на изборниот ден 15 јули 2020 година, на вонредните парламентарни избори набљудувачите на ЦИВИЛ беа застапени во сите шест изборни единици во Северна Македонија.
Загрижувачки се податоците од мониторингот на ЦИВИЛ во кој се нотирани многу опструкции кон набљудувачите на оваа граѓанска организација, додека ги извршувале своите задолженија.
Нападите, репресиите и заканите најчесто доаѓаат од набљудувачи на политички партии, најчесто од ВМРО-ДПМНЕ, поретко од СДСМ, од страна на изборната администрација, од гласачи, но и од полицијата.
Бркање од гласачко место, навреди кон претседателот на ЦИВИЛ, квалификации за тоа дали организацијата е партиска или не, дофрлувања за висина на надоместокот, дрскост и одбивност се најчестите притисоци и опструкции кои се забележани во мониторингот на ЦИВИЛ за текот на изборниот ден.
ФЛЕШ ВЕСТИ
Судењето за организаторите на настаните од 27 април во Собранието, продолжува на 26 август, откако на денешното рочиште одбраната почна со презентирање на материјални докази.
Владата и претставниците на средношколците ќе соработуваат за најдобра имплементација на моделот за организирање и спроведување на наставата во основното и средното образование во услови на Ковид-19.
Иницијативата за промени во ВМРО-ДПМНЕ, денеска одржа прес-конференција пред седиштето на партијата, од која бараат оставка од Христијан Мицкоски, и свикување на вонреден конгрес за избор на нов претседател.
За првпат во историјата на земјата, Северна Македонија треба да добие премиер Албанец. Тоа е највпечатливиот исход од коалициските преговори во балканската земја, која е членка на НАТО и кандидат за членство во ЕУ, и ги надминува внатрешните дневнополитички случувања, пишува германскиот весник Франкфуртер алгемајне цајтунг во денешната анализа за постизборните превирања во Северна Македонија во текст под наслов „Мултиетнички грабежи“.
СЛОБОДНА ЗОНА
