Генералниот секретар на ОБСЕ, Томас Гремингер и заменик – генералниот секретар на ОН и шеф на Канцеларијата за борба против тероризмот на ОН, Владимир Воронков денеска во Виена потпишаа Меморандум за разбирање преку кој ќе ја зајакнат соработката меѓу двете организации во спречување и борба против тероризмот.
Преку Меморандумот овие две организации се согласија дека ќе работат на заеднички проекти за поддршка и имплементација на четирите столбови на Глобалната стратегија на ОН за тероризам, релевантни Резолуции на Советот за безбедност на ОН, План за акција на ОН за спречување на насилен екстремизам, како и на принципите и заложбите на ОБСЕ. Исто така, организациите се обврзаа да изработат план за заеднички активности во наредните две години.
Според Гремингер овој Меморандум претставува важна пресвртница во зајакнувањето на соработка и заедничките активности во корист на засегнатите страни. Воронков, пак, истакна дека еден од главните приоритети на ООН е да ја зајакне меѓународната соработка против тероризмот на глобално, регионално и национално ниво.
Гремингер и Воронков се согласија дека ќе работат и на обезбедување техничка помош за националните власти во областа спречување на насилниот екстремизам, финансирањето, безбедноста и управувањето со границите, промовирање одговори на тероризмот во согласност со законот, спротивставувајќи се на користењето на интернетот за терористички цели и подобрување на заштитата на критичната инфраструктура, по барање на една држава.
Б. Ј.