МВР соопшти дека обврските на министерсвото во рамки на Планот 3-6-9 се исполнети до крај. Еден од приоритетите на МВР се однесува и на реформата на разузнавачките служби која делумно е спроведена, односно од предвидените шест мерки, три се целосно исполнети, а три се во напредна фаза и ќе бидат завршени во предвидениот рок.
Започнувањето на инклузивна дискусија во Собранието за избор на моделот за реформа на системот на следење на комуникациите е мерка што е завршена и го обврзува директорот на УБК редовно да учествува на седниците на надзорните тела во Собранието, а се очекува и сеопфатна дебата на оваа тема.
Што се однесува, пак, до одделот за организиран криминал, борбата е насочена кон започнување со реформи на одделението за борба против корупција во МВР, зајакнување на Финансиската полиција и формирање на меѓуинституционална работна група со цел зајакнување на капацитетот и експертизата за спроведување на истраги и конфискација на имот на посистематска основа и овозможување опрема/пристап и потребен персонал за спроведување на следење на комуникации на Царинската Управа и Финансиската полиција, зависно од моделот кој ќе биде избран за реформа на разузнавачките служби.
Во делот миграции веќе е завршено формирање на преговарачки тим, усвојување на преговарачки позиции и започнувањето преговори за Статусниот договор со Европската агенција за гранична и крајбрежна стража, иницирање технички состаноци со ЕК за усогласување на националниот систем со релеватните барања на ЕУ и Шенген правилата, формирање специјална единица (task force) за борба против трговија со луѓе и криумчарење на мигранти, составена од претставници од Основно јавно обвинителство за борба против организиран криминал и корупција и МВР, како и ревидирање на Законот за азил и времена заштита согласно препораките на експертот на ЕК.
„Следејќи ги приоритетите на Владата на Република Македонија за отпочување на реформскиот процес кој ќе овозможи зајакнување на капацитетите на институциите, враќање на демократските вредности и нивно доследно почитување, отворена соработка со граѓанското општество, Министерството за внатрешни работи ја изрази својата подготвеност за активно вклучување во планирање и спроведување на неопходните реформи“, се вели во соопштението на МВР.