Од печат излезе „Амбиент“ – книга осма (2025-2026) („lu-ping“) на Зоран Иванов, еден од бардовите на македонското новинарство, објави Слободен печат.
Приредувач, редактор и издавач и на оваа книга, како и на претходните „Амбиент“ е Свето Стаменов, политиколог, поранешен новинар на Македонското радио – Радио Скопје и познат македонски публицист.
Осмата книга на „Амбиент“ фактички е природно продолжение на претходната седма книга, која беше објавена точно пред една година, или поточно континуитет на, како што вели самиот автор, „неговите континуитети од неговиот „Амбиент“ број 1 до овој „Амбиент“ број 8“. Серијалот „Амбиент“ започна со книга прва (1990-1994) и книга втора (1995-1997), објавени во 1999 година.
Серијалот „Амбиент“, што го реализира Стаменов во изминативе дваесетина години, несомнено е своевидна три и пол децениска хронологија на македонските турбуленции во периодот од пред и за време на осамостојувањето на Македонија, транзициските премрежиња, егзистенцијалните, меѓуетничките, партиско-политичките турбуленции, како и нестабилните меѓународни позиции на државата.
Содржини од оригинални авторски новинарски текстови на теми кои, сместени меѓу кориците на осумте Зоранови „Амбиенти“, го актуелизираат и ова време сегашно и она натаму идно.
Како и сите претходни, и оваа осма книга „Амбиент“ на Иванов е со своја специфика.
Таа, всушност, е негов нов журналистички серијал објавуван на престижниот веб-портал „Нова тв.мк“ под генерален наслов „lu-ping“, кој содржи точно сто куси новинарски текстови – коментари посветени на актуелни случувања на домашната и на меѓународната сцена, објавени во периодот од 9 јануари 2025 година до 3 март 2026 година, како и три текста од неговата новоотворена рубрика „Post scrip-um“, исто така, на интернет порталот Нова, каде што Иванов е главен уредник.
Станува збор за куси, јасни, воедно продлабочено сложени текстови кои ги отсликуваат оригиналноста, острината, директноста и бескомпромисноста на авторовите ставови со времето и, особено, со возбудливоста што тие ја предизвикуваат кај читателот.
И во оваа осма, како и во претходните седум книги, Иванов останува актуелен, уникатно директен. Напати ироничен, но содржаен, покажувајќи ги ретката аналитичка дарба и неверојатниот сенс преку актуелните случувања да ги предочува и наредните неминовни процеси и настани.
Токму затоа, „Амбиент“ – книга осма (2025-2026) („lu-ping“) е уште еден уникатен одблесок на, сега веќе, пет и полдеценискиот новинарски опус на Зоран Иванов, бард на македонското новинарство, аналитичар, хроничар на денот и времето, журналистички епилог без крај.
