Навивачките групи на „Тетекс“ и на „Шкендија“, со шовинистички навреди, пцости и фрлање предмети, ширеа меѓуетничка омраза, МВР и Обвинителството најавуваат реакција
Членови на навивачката група на фудбалскиот клуб „Тетекс“ – „Војводи“, по повод 30 годишнината од нејзиното основање, во петокот маршираа низ улиците на Тетово. По маршот, на социјалните мрежи беа објавени видео-материјали, со навредливи скандирања и говор на омраза упатен кон Албанците. По маршот, четири лица – членови на навивачката група на ФК Шкендија – „Балисти“, биле приведени затоа што физички нападнале дел од учесниците на маршот. На интернет страницата на „Балистите“, се појавија објаснувања со аргументи дека конфликтот бил последица на навредите од навивачите на „Тетекс“.
Истата вечер било повредено и едно 15-годишно момче, за што имаше и официјално известување од полицијата, а членови на навивачката група „Балисти“, на социјалните мрежи обвинија дека малолетникот бил физички нападнат од „Војводите“ кои марширале. Од МВР пак, известија дека се преземаат мерки за расветлување на случајот.
Следниот ден, во саботата, навивачката група „Војводи“ маршираше низ улиците на Тетово. На социјалните мрежи граѓани известуваа дека имало и физички пресметки меѓу нив и млади Албанци, но немаше официјално известување од полицијата за евентуални инциденти. Во неделата (4 ноември), „Балистите“ организирале контра- марш во текот на кој, според објавите по социјалните мрежи од граѓани-Македонци и дел од локалните медиуми, извикувале навреди кон Македонците („македонско девојче к***а голема“), и фрлале тврди предмети кон угостителски објект за кој претпоставувале дека е во сопственост на Македонец.
Од Министерството за внатрешни работи го потврдија случајот, но соопштија и дека немало материјална штета. „Досега нема пријави за повредени, ниту за материјална штета. Навивачите се движеле во правец на стадионот, и освен скандирањето и навредувачките извици, фрлале со камења и шишиња во правец на терасата од објектот“, се вели во соопштението на МВР.
За инцидентите, навредливите скандирања и говорот на омраза, тетовската полиција имаше средба со претставици на Основното обвинителство во Тетово, за да се прецизира кривичното дело и да се покренат адекватни постапки за лицата учесници во случките, од двете навивачки групи. И министерот за внатрешни работи, Оливер Спасовски изјави дека се преземаат превентивни мерки за спречување на ескалирање на ситуацијата, како и мерки за расветлување на случаите.
„За навивачите што скандирале националистички повици во Тетово, во рамките на СВР Тетово се преземаат мерки и во делот на едната, и на другата група. Денес си дадовме посебна задача во делот на превенција за работа со двете навивачки групи. Не смееме да дозволиме нивните конфликти, коишто потекнуваат од еден таков говор на омраза, да се претворат во секојдневие во Република Македонија“, изјави Спасовски.
Арбен Зеќири
