Гладот во Газа е „потиснат“, а значително повеќе луѓе сега имаат пристап до основна храна за преживување, изјави генералниот секретар на ОН, Антонио Гутереш. Според декемврискиот извештај на Интегрираната класификација за фази на безбедност на храна (IPC), состојбата со безбедноста на храна и исхраната бележи подобрување по речиси две години жестоки судири меѓу Израел и Хамас.
Сепак, хуманитарната состојба останува крајно кревка. Околу 1,6 милиони жители на Газа и натаму се соочуваат со сериозна несигурност во пристапот до храна, а повеќе од 100.000 деца на возраст од 6 до 59 месеци се очекува да развијат акутна неухранетост и да имаат потреба од итен третман до средината на октомври 2026 година.
Извештајот предупредува дека евентуално обновување на целосни воени дејствија би можело повторно да турне значителни делови од Појасот Газа во состојба на глад со месеци, поради нарушување на пазарите и прекин на одгледувањето на локалните земјоделски култури.
Документот ја нагласува кревкоста на состојбата и покрај номиналниот прекин на огнот постигнат во октомври. Иако американскиот претседател Доналд Трамп доби меѓународни пофалби за улогата во постигнувањето на договорот и ослободувањето на 20 живи израелски заложници, медиумски извештаи укажуваат дека американски претставници приватно изразиле загриженост оти делови од договорот би можеле да се распаднат. Во меѓувреме, израелските сили и понатаму изведуваат повремени напади врз Газа.
„Одржливи, проширени и непречени хуманитарни и трговски текови низ целата територија се клучни за справување со предизвиците наведени во оваа IPC анализа“, наведуваат авторите на извештајот, додавајќи дека тоа бара трајно политичко решение и обнова на клучната инфраструктура и средствата за егзистенција.
