Министерот за надворешни работи, Бујар Османи во своја објава на Фејсбук соопшти дека четиричленото семејство Скаик по подолго време е безбедно евакуирано од Газа и тие денеска се вратија во земјава. Османи истакна дека сите напори сега се фокусирани на извлекување на уште двајца наши државјани, брачен пар, чија евакуација, како што вели, ја очекуваат наскоро.
-Семејството Скаик, после подолго време безбедно евакуирани од Газа, а од денес на сигурно во земјава. Евакуацијата од Газа претставува посебен дипломатски и пред сѐ конзуларен предизвик, имајќи ја предвид сложената безбедносна состојба во тој регион. Посебно сакам да оддадам признание на дипломатите во нашите амбасади во Каиро и Тел Авив, кои беа во постојан контакт и со семејството и со властите во Египет и Израел, напиша Османи.
Министерот упати благодарност до Меѓународната организација за миграции (IOM) која помогнала при нивниот трансфер во Скопје, како и Министерството за труд и социјална политика, односно Центарот за социјална работа во Скопје, за организацијата на сместувањето.
М. П.
