Статусот на реализацијата на реформите во клучните области содржани во Планот 3-6-9 како и новите потенцијали согласно пораките содржани во новата Стратегијата на ЕК за проширување со земјите од Западниот Балкан до 2025 година беше главна темна на 38. седница на Работниот комитет за европски интеграции (РКЕИ) што се одржа денеска во Владата во рамки на генералниот колегиум, со која претседаваше вицепремиерот задолжен за европски прашања, Бујар Османи.
– Добивме исклучително позитивни пораки од страна на ЕК, со кои се валоризира досегашниот напредок во имплементацијата на реформите и подготовката на земјата за напредок во европските интеграции, истакна Османи, додавајќи дека Комисијата испрати јасни пораки дека Македонија треба да очекува чиста препорака за почеток на преговори со следниот извештај, но и согласно отстранувањето на политичките пречки, одлука од страна на Советот на ЕУ за почеток на преговори.
Како што соопшти кабинетот на вицепремиерот Османи, тој ја истакнал одговорноста и улогата на членовите на Работниот комитет за фокусот на целата администрација кон предложените реформи, притоа потенцирајќи дека оваа 2018 година претставува најзначајна година за европските интеграции на земјата, период во кој следат серија настани преку кои треба да ја изградиме нашата позиција за членство во ЕУ.
– Почетокот на преговорите со ЕУ станува реалност за Република Македонија и покрај Секретаријатот како предводник на евентуалниот процес на преговори, потребно е и целата администрација соодветно да ги подготви капацитетите за трансформација на државата и општеството кон европските правила, стандарди и вредности, истакна Османи, стои во соопштението.
Во истиот контекст, се додава, Османи најави засилен мониторинг преку механизмот за надгледување и координирање на реформите, но и почести седници на Комитетот.
Работниот комитет за европски интеграции (РКЕИ) претставува највисоко административно тело на Владата во кое членуваат државните секретари на министерствата, претседавачите на поткомитетите, раководителите на работните групи, Генералниот секретар на Владата, како и администрацијата на Секретаријатот за европски прашања.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини
