Советот за етика во медиумите во Македонија со голема загриженост реагира на зачестените случаи на злоупотреба на одредени медиуми, особено во контекст на сегашната политичка ситуација, за ширење шпекулации, пропагандизам и невистини, кои би можеле да ги засилат тензиите и да доведат до потенцијални немири во општеството.
Советот во соопштението истакнува дека веќе подолго време реагира на ваквите случаи, но и дека во последниве неколку дена тие се зачестени до загрижувачки нивоа.
„Особено загрижувачки е начинот на информирање на медиумите во кои што се забележуваат новинарски извештаи со еднострано информирање и информации што ги подгреваат стравувањата за можни немири во општеството, содржејќи повици за мобилизација на граѓаните во служба на одбрана на интересите на определени политички партии“, се вели во соопштението на СЕММ.
Советот потсетува дека медиумите не смеат да бидат злоупотребени за пренесување повици за обединување поединци и групи за радикално однесување и постапки кои го загрозуваат јавниот ред и мир во општеството, а особено на член 10 од Кодексот, според кој „новинарот нема да поттикнува на насилство и дискриминација по која било основа”.
„Медиумите мора да го почитуваат Етичкиот кодекс, бидејќи во спротивно последиците од непридржувањето кон неговите одредби би можеле да бидат фатални. Медиумите имаат особено важна улога во заштитата на граѓаните од појавата на нетолеранција и недоверба и нивна изложеност на ризик од насилство“, стоиво соопштението.
СЕММ повикува на реакција и од другите институции, вклучувајќи ја Агенцијата за аудио и аудиовизуелни медиумски услуги и Јавното обвинителство, и на осудата на хушкачкиот и потпалувачки говор, како и во преземање на неопходни мерки во согласност со законската рамка.
„СЕММ продолжува да го набљудува начинот на информирање на медиумите, како на оние кои се дел од членството, така и на оние кои се’ уште не се негови членки, и ќе повикуваме на доследно почитување на Кодексот на новинарите како предуслов за припадност на ова наше, заедничко, професионално тело за саморегулација во медиумите“, се вели во соопштението на СЕММ.
