ЦИВИЛ Медиа разговараше со Кристина Озимец, новинарка и претседателка на Платформата за истражувачко новинарство и анализи (ПИНА) за слободата на изразување и нејзината цена, медиумските слободи, како и улогата на активизмот.
Таа вели дека за разлика од претходната власт, сега има поголема слобода на изразување, меѓутоа новите избраници кои се на власт некако се нежни при критика.
ЦИВИЛ Медиа: Што за вас претставува слободата, слободата на изразување и активизмот?
Oзимец: По негативното искуство со претходната власт, сега може да кажеш што сакаш, секако поткрепено со факти, и да не се грижиш дека ќе имаш последици за тоа. Ова го кажувам од претходното искуство од претходната власт, која беше навистина репресивна кон медиумите и новинарството.
Активизмот го има во сите полиња и сфери на живеење. Новинарите често беа и активисти, на пример, бевме активисти кога организиравме и учествуваме на протестите за слободни медиуми. Активизмот не мора да значи некој голем протест, може и да бидат самостојни акции коишто ќе го привлечат вниманието на јавноста и со тоа ќе го свртат погледот на медиумите и јавноста на одреден проблем.
ЦИВИЛ Медиа: На кој начин вие придонесувате за слободата на медиумите, медиумските слободи и активизмот?
Oзимец: Најмногу се трудам да го направам тоа преку сториите кои ги објавувам, преку професионално работење. Со тоа најмногу се обидувам да влијаам и на некој начин да покажам дека една млада новинарка може професионално да си ја извршува работата (не знам колку јас успешно ја извршувам, но се надевам дека ја извршувам како што треба).
Ние неколку млади новинари ја формиравме Платформата за истражувачко новинарство и анализи (ПИНА), и мислам дека сме едни од ретките млади новинари кои се решивме да придонесеме во медиумската сфера. Овој месец го организиравме истражувачкиот филмски фестивал во Скопје, и тоа се само дел од акциите со кои се обидуваме да придонесеме, секоја на свој начин, за подобрување на медиумската сфера, на јавното мислење, на целото општество и на демократијата.
ЦИВИЛ Медиа: Дали се соочувате со притисоци од политичките или бизнис центрите на моќ, и на каков начин се справувате со нив?
Oзимец: Секако дека сме се соочиле со притисоци, претходно беше потензична и понапната атмосфера со претходната власт и гарнитура, тоа беше тотална ненормална атмосфера за функционирање на сите граѓани не само на новинарите, коишто беа на удар веќе со години и кои се навикнаа на таа постојана тензија и пресија.
Сега има некаков вид на ослободување, дури и со промена на нормална власт следи некое ослободување, а не пак во нашиот случај. И сега има, не би ги нарекла притисоци, би рекла реакции, и некако новиве избраници ми делуваат пренежни на критика. Иако се залагаат за критика, сега засега декларативно го кажуваат тоа, меѓутоа мислам дека е прерано да дадеме коментар бидејќи треба да помине малку време да видиме дали ќе останат доследни за транспарентност.
ЦИВИЛ Медиа: Која е вашата препорака за унапредување на слободата на изразување, медиумските слободи и човековите права?
Oзимец: Во овој момент е битно да има поддршка за сите млади кои што се обидуваат да работат независно, не само во медиумите туку во сите сфери… Кога велам да има соработка, мислам на соработка со институциите и сите други фактори во општеството, меѓутоа под соработка не значи да ги ставиме „под наше“, значи некој не мора да биде со нас. Тоа не е соработка. Значи не мора да мислиме сите исто и идентично, можеме да не се согласуваме за еден куп работи и пак да биде сè во ред, да нема конфликт. Едноставно може да не се согласиме и повторно да работиме нешто заедно за доброто на општеството во различни сфери. Треба да се препознаат тие луѓе и да им се даде поддршка на младите потенцијали во општеството.
Фари Хисени
Камера: Дехран Муратов
Монтажа: Ермин Климента
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.