Конзервативците на германската канцеларка Ангела Меркел и Социјалдемократската партија на Германија (СПД) разменија остри реплики за миграцијата и даночните намалувања, а во исто време локалните медиуми коментираат дека се поголеми се сомнежите дека може да се постигне договор за нова „голема коалиција“.
Партиските лидери утре ќе се сретнат на прелиминарни разговори пред првичните преговори кои треба да се одржат од 7 до 12 јануари.
Во меѓувреме, расте бројот на политичарите кои тврдат дека Меркел ќе управува со малцинска влада или ќе оди на нови избори.
Заменик-претседателот на СПД Торстен Шефер-Гимбел истакна дека последните изјави од таборот на конзервативците се „контрапродуктивни за составувањето на каква и да било влада“ и оти тие предизвикале сомнеж за тоа колку конзервативците имаат волја за заедничко владеење.
Според него, постигнувањето договор за нова коалиција е „далеку, не е сигурно и не е јасно дали во преговорите ќе може да биде создадена доволно доверба“.
– Малцинска влада останува опција, дури и ако канцеларката Ангела Меркел не сака да го признае тоа, рече тој во интервју за весникот „Пасауер Ноје Пресе“.
Шефер-Гимбел ги истакна разликите со конзервативците за серија прашања и ги окарактеризира како „смешни“ предлозите на некои кругови во конзрвативните редови за намалување на даноците за лица со високи примања.
Меѓу конзервативците и социјалдемократите има големи разлики и во прашањата за здравство, миграција, Европа, работни односи и пензии.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
