„Мислам дека сè уште има време Иванов да се премисли, сé уште има време за дијалог, мислам дека е време партиите да зборуваат меѓу себе и да се слушаат меѓу себе. Тоа, исто така, се однесува и на меѓународната заедница во Македонија. Се надевам дека претседателот Иванов следниот пат ќе го прими комесарот или некого друг од меѓународната заедница и дека тоа ќе биде дијалог, и дека на крајот, некои позиции ќе бидат преиспитани“, е ставот на холандскиот амбасадор во Македонија, Воутер Пломп, изнесен во разговор за ТВ-емисијата Фактор 24.
Во интервјуто Пломп се осврнува на политичката криза што, според него, започнала по објавувањето на прислушуваните разговори, што открија информации за корупција и криминал.
„Специјалното обвинителство е основано токму за темелно да ги истражи тие наводи и да ги изведе пред правдата. Ова што го гледаме во последните месеци или година, е токму она што беше опишано во извештајот на Стејт департментот, во кој се вели дека е јасно оти постои координирана кампања за намалување на кредибилноста и професионализмот на СЈО. Тоа е сериозно. Зашто, ако СЈО не може да го спроведе она за што е основано, темелно да ги истражи наводите, тогаш се чини, дека целиот процес од Пржино е залуден. Така што, освен ако СЈО не го спроведе она за што е формирано, нема да има крај на оваа криза“, смета Пломп, кој порача да се остави СЈО да работи непречено без опструкции од институциите.