Владата на Косово ја одложи примената на одлуката од 1 август, граѓаните на Србија кои влегуваат во Косово да добиваат влезно-излезна лиценца на сите гранични премини, како што тоа повеќе од десет години се прави со косовските граѓани кои влегуваат во Србија, како и обврската за промена на српските регистерски таблички за косовските возила, означени со КМ (Косово и Метохија), со косовски регистерски таблички со ознаката РКС (Република Косово), односно, мерки на реципроцитет.
Одложувањето доаѓа по синоќешните тензии на косовско –српската граница Јариње и Брњак, а по консултации на претседателката на Косово, Вјоса Османи и премиерот Курти со американскиот амбасадор Џефри Ховеније.
Во северниот дел на Косовска Митровица вчера попладне се огласија и сирени за узбуна, додека на повеќе патишта кои водат кон граничните премини Брњак и Јариње беа поставени блокади, кои предизвикаа километарски колони, пред косовските власти целосно да ги затворат премините.
Блокадите почнаа неколку часа откако претседателот на Србија, Александар Вучиќ, ѝ се обрати на јавноста тврдејќи дека Приштина подготвува напад врз косовските Срби и погром како оној во 2004 година.
Српските власти неколку дена повторуваа дека на косовските Срби им се подготвува „пекол“, а во текот на денот се појавија вести дека силни косовски специјални полициски единици се упатуваат кон северот, кои косовската полиција ги нарече „лажни вести“.
Атмосферата е вжештена и Србите нема да трпат повеќе злосторства, изјави Вучиќ вчера во Белград.
„Мојата молба до сите е да се обидеме да го зачуваме мирот речиси по секоја цена. Ги молам Албанците да се вразумат, Србите да не наседнуваат на провокации, но ги молам и претставниците на моќните и големи земји, кои ја признаа таканаречената независност на Косово, малку да внимаваат на меѓународните законот и реалноста на теренот и да не дозволат нивните штитеници да предизвикуваат конфликти,“ изјави Вучиќ.
Косовскиот премиер Албин Курти претходно изјави дека одлуката за добивање документ и промена на регистарските таблици се реципрочни.
„Ние не би ги претпочитале таквите документи. Меѓутоа, ако нашиот граѓанин добива таков документ, тогаш истиот треба да го добие и српскиот граѓанин. Исто како што не бевме ниту за привремените таблички, но додека има такви за нашите граѓани кога влегуваат во Србија, потребно е да има и за српските граѓани кога влегуваат во Косово“, изјави Курти.
„На политичката сцена има многу политичари и официјални лица кои се лидери со страв и заплашување. Мирот, демократијата, правната држава немаат алтернатива, па сакам, верувам и работам на тоа утре се да помине без проблем. Србија веќе 11 години отстапува исто со секој граѓанин на Косово кога ќе ја премине границата и ќе влезе во Србија. Нема место за напнатост, нема можност за дестабилизација бидејќи се работи за нешто што е легитимно и легално. Тие што зборуваат за насилство, блокади, дестабилизација и тензија, зборуваат за себе, а не за нас“, изјави меѓу другото Курти.
Руското Министерство за надворешни работи ги повика Приштина, САД и ЕУ да престанат со провокациите и да ги почитуваат правата на Србите на Косово, соопшти официјалната претставничка на Министерството за надворешни работи на Русија, Марија Захарова.
– Косовските лидери знаат дека Србите нема да останат рамнодушни кога станува збор за директен напад на нивните слободи и тие намерно ескалираат за да предизвикаат воено сценарио. Секако, цел на напад е и Белград, кој Западот сака дополнително да го „неутрализира“ со рацете на косовските Албанци, изјави Захарова.
Таа истакна дека Москва ги повикува ЕУ, САД и Приштина да престанат со провокациите, и дека ваквиот развој на настаните е уште еден доказ за неуспехот на медијаторската мисија на ЕУ, нагласи Захарова.
Целокупната безбедносна ситуација во општините на северот на Косово е тензична, оцени мисијата на ОН КФОР, на денот кога Србите на северот на Косово поставија блокади пред спроведувањето на одлуката на косовските власти за регистарски таблички и документи. КФОР под раководство на НАТО внимателно следи и е подготвен да интервенира доколку е загрозена стабилноста на Косово, согласно неговиот мандат, кој произлегува од резолуцијата 1244 на Советот за безбедност на ОН од 1999 година, соопштија од оваа мисија. КФОР, како што беше речено, ќе ги преземе сите неопходни мерки за одржување на безбедна и безбедна средина на Косово во секое време, во согласност со мандатот на ОН.
Примената на мерките на реципроцитет е одложена до 1 септември.
Д. Т.
