Политичките партии реагираа на завршните зборови на Обвинителството во случајот Монструм.
Опозицијата од редовите на Албанците смета дека повторното судење не ја открила вистината бидејќи се користеле истите докази како и на првото судење. Го сметаат за инструментализирано Обвинителството, а случајот „Монструм“ го сметаат за политички монтиран.
„Видовме политички инструментализирано обвинителство, обвинителство кое за жал, со албански инструмент ја реализира антиалбанската политика на разни водечки кругови. Обвинува за тероризам без да наведе никакви мотиви, кои се нарачателите, кој има корист од дестабилизација на земјата. Сметаме дека тоа е политички монтиран случај за кој треба да одговараат сите тие кои се одговорни“.
ВМРО ДПМНЕ го обвини премиерот Зоран Заев, дека си игра со судбината на жртвите кога најави дека невини луѓе се наоѓаат во затвор за случајот Монструм.
„Фатиме Фетаи вели дека немало ништо во бомбите за случајот „Монструм“, барајќи казна за веќе обвинетите. Заев рече дека невини луѓе се во затвор за случајот „Монструм“. Главното прашање е зошто Заев лажеше и ја злоупотреби трагичната судбина на семејствата на убиените од Смилковското езеро за политички цели. Главниот политички монструм во „Монструм“ е Зоран Заев“.
Артан Груби од ДУИ рече дека тие побарале повторно судење, но не интервенирале во судската постапка.
„Заедно бевме посветени за да има повторно судење за случајот „Монструм“. Тоа е работа на судството, обвинителството, одбраната, во судска постапка да го докажат обвинението или невиноста. Никогаш не сме интервенирале во овој процес, освен барањето да се повтори ова судење во целост и го постигнавме тоа. Сега е на судските органи, судот и обвинителството и на одбраната, овој процес да го тераат до крај“.
Обвинителката во случајот „Монструм“, Фатиме Фетаи побара доживотен затвор за Алил Демир и за Агим и Африм Исмаиловиќ. Максимални казни побара за Фејзи и Хаки Азири. За обвинетиот Сами Љута обвинението е повлечено поради недостаток на докази.
Извор: Алсат