Постарите ученици во Полска се враќаат на учење од далечина откако земјата објави рекорден пораст на случаи на новозаразени со коронавирус, втор ден по ред, пренесува информативната агенција МИА.
Во изминатите 24 часа бројот на заболени е зголемен за 57.659, соопшти Министерството за здравство. Во истиот период во Полска, која има 38 милиони жители, починале 262 лица.
Министерството за образование им наложи на учениците од петто одделение и погорните класови да останат дома. Првично предвиденото времетраење на мерката е еден месец.
Полските власти, исто така, почнаа да обезбедуваат бесплатни тестови за коронавирус. Досега има 64 аптеки низ државата во кои граѓаните можат да ги искористат, изјави министерот за здравство Адам Неџелски; има и други објекти кои во моментов аплицираат за дозвола за извршување на такви активности.
Во моментов 2.600 паралелки во Австрија се испратени во карантин поради коронавирусот, а девет училишта се затворени, соопшти денеска Министерството за образование.
Во Австрија има околу 6.000 училишта и близу 58.000 паралелки, така што 95 отсто од часовите се уште се одржуваат нормално. Сепак, бројот на паралелки кои се префрлаат на онлајн часови рапидно расте поради појавата на Ковид-19 кај учениците.
Во вторникот беше објавено дека 1.900 паралелки се испратени во карантин, а по два дена тој број се зголеми на 2.600. Според правилото кое во моментов се применува при откривање инфекција кај еден ученик, наставата продолжува нормално, но учениците мора да се тестираат секојдневно во наредните пет дена. Доколку во рок од три дена се откријат инфекции кај друг ученик, паралелката се испраќа во карантин, односно на онлајн часови.
Инаку, учениците се тестираат трипати неделно во училиштата, од кои еден мора да биде ПЦР тест. Кога станува збор за градинките во Виена, 11 отсто од детските групи моментално се во карантин.