Претседателот на Советот на јавни обвинители, Петар Аневски, поднесе оставка пред седницата на која требаше да се избере в.д. Јавен обвинител наместо разрешениот Марко Зврлевски.
„Членовите на Советот ќе одлучуваат по мојата оставка в четврток. Дали ќе ја прифатат или не, тоа е нивна одлука. Без разлика на оставката, и понатаму останувам на функцијата член на Советот на јавни обвинители, бидејќи сум избран од Вишото обвинителство од Битола и ќе продолжам со таа функција од 1-ви септември, ако биде прифатена мојата оставка“, изјави Аневски.
Според него, причините за оставката се лични и семејни. При гласањето по предлогот на Владата за разрешување на Зврлевски, Аневски беше единствениот глас „против“, наспроти останатите осум членови кои позитивно се изјаснија за разрешување на контроверзниот обвинител, и излезе со став дека Зврлевски е „перфектен во извршувањето на неговата функција„.
Аневски е избран за претседател на Советот во 2014-та, во 2016 година беше и реизбран, со реакции во јавноста за незаконитост, а мандатот како член во Советот му истекува во 2020-та година.
За вршител на должноста Јавен обвинител, на местото на Зврлевски е избрана Лилјана Спасоска, која ќе ја врши должноста до изборот на нов обвинител. За јавен обвинител во Јавното обвинителство е избрана на 1 јуни 2009, а од декември 2013 година ја извршува и функцијата заменик на Јавниот обвинител на Република Македонија.
