Како дел од антикризните мерки на владата, над 230 компани кои произведуваат основни прехранбени продукти од 1 декември ќе плаќаат субвенционирана струја, по двојно пониска цена, што треба да предизвика и пад на цените на основните прехранбени продукти во земјава.
ЕСМ Продажба ги испрати по пошта договорите за снабдување по субвенционирана цена до речиси сите јавни основни и средни училишта кои поднесоа пријави и кои ги исполнуваа условите, а за чии броила ЕВН Дистрибуција одобри снабдување.
-Тече испраќањето на договорите и на правните субјекти од прехранбената индустија, и тоа за оваа категорија ќе биде завршено до крајот на утрешниот ден. Најмал број пријавени субјекти произлегуваат од водостопанската дејност, кои исто така ќе ги добијат договорите, велат од ЕСМ.
Субјектите за кои Дистрибуција не одобува снабдување на нивните броила или на дел од нивните броила, се известуваат телефонски, со цел да преземат мерки во однос на причините, а бројот на таквите случаи не е мал, информираат од ЕСМ Продажба.
-Сите субјекти пријавени за дополнително снабдување по одлуката на Владата, а кои ги исполнуваат условите и чии броила се одобрени од Дистрибуција, ќе бидат снабдувани од ЕСМ Продажба од 1.12.2022 без оглед дали до тој датум ќе им пристигнат договорите по пошта. Субјектите се веќе ставени во системот на ЕСМ Продажба и треба да ги прават своите пресметки за производниот и работниот процес врз основа на новата цена на електричната енергија која ќе ја плаќаат, а тое е 80 е/MWh за прехранбената индустрија за основните производи, и 95 е/MWh за училиштата и водостопанствата, велат од ЕСМ.
Тие додаваат дека од 1.1.2023 на субвенционирано снабдување ќе бидат приклучени сите субјекти кои дополнително ќе се пријават во следниот период, како и тие кои при првото пријавување немале комплетни документи и кои истите ќе ги комплетираат.
Согласно владината одлука компаниите кои вршат производство на основни прехранбени производи како леб, пекарски производи, брашно, масло, млечни производи, месна индустрија ќе добиваат субвенционирана струја по цена од 80 евра за мегават час.
Целта е да се одржи стабилна цената на основните прехранбени производи, да не дојде до раст на нивните цени предизвикани од исклучително високите сметки за струја или прекин на производство.
Покрај компаниите, поевтина цена струја ќе плаќаат и 230 основни и средни училишта и 50 јавни претпријатија.
Покрај оваа субвенција, владата ја субвенционира и цената на струјата за 600.000 домаќинства и за 72.000 компании на регулираниот пазар.
С.Т