пишува: ЏАБИР ДЕРАЛА
Тие што се промовираа како заштитници на земјоделците… Ајде да бидеме директни… Партијата и нејзините тролови што се промовираат (се продаваат) како заштитници на земјоделците и сточарите, се подбиваат токму со нив. Со години трошеа по стотина милиони евра годишно од буџетот под изговор дека им помагаат на земјоделците, дека ги развиваат земјоделието и сточарството во земјата… Арно ама, земјоделците и сточарите беа „високо на нивната агенда“ само на хартија. Тоа се лажни заштитници.
Знаеме сите, тоа беше само политичка корупција, за плаќање на сопствените партиски војници. Со други зборови, шарена лага, како за земјоделците и сточарите, така и за сите нас. За какви покондурени простаци се работи, се гледа деновиве, кога крајно неумесно и несмасно (глупаво) се подбиваат со проекти од европските фондови наменети за дејности во сточарството.
Срамно е да се гледа како пропаѓаат сите тие пароли за грижа за селото и за фармите. Очигледно не разбираат, толку се прости, па се исмеваат со оние што со својата вредна работа ни носат храна на трпезите. На овие ајдучишта и размазенковци што се возат во своите скапи автомобили на „масовните протести“ веројатно не им ни текнува дека ги навредуваат токму тие за кои велат дека ги застапуваат.
За начинот на кој се работело во Националната агенција која менаџира дел од европските фондови се изјасни директорката Димова, но последниот збор ќе го кажат институциите. Од друга страна, доволно јасно проговори и вицепремиерот Љупчо Николовски чија задача е борба против корупцијата. Тој побара морална одговорност и оставка, односно разрешување на Димова. Нема ништо појасно во целиот случај. Ако некогаш крадеа милијарди и убиваа луѓе, сега има институционална и политичка реакција. Речиси досадно европски…
Секако, поинтересно е да се следи и реакцијата на структурите што, додека беа на власт, го презираа и ограбуваа „народот“ и сѐ уште се вгнездени во сите пори на системот. Има уште да се зборува и пишува за тоа, игранката е многу поголема, отколку што се чини на прв поглед.
Но денеска зборуваме за атрофираните умови и неморалот на оние што се подбиваат и го потценуваат значењето на развојот во руралните средини. Тие што дошле од село и плукнале на своето потекло се неранимајковци. Најраспрдени „фаци“ во градот… Шутраци!
Не смее да се испушти уште нешто што ја илустрира нивната расипаност и глупост. Ги понижуваат и животните. Очекувам организациите за заштита на животните да напишат збор-два во одбрана на животните. Како што би рекол и Кундера: „Вистинскиот тест на човечкиот морал, неговиот фундаментален тест, се состои во неговиот однос кон тие што се во негова милост: животните“. Овие што се подбиваат со животните и луѓето што ги одгледуваат за да нанесат политичка штета паднаа на тестот.
Навикнавме, иако навистина не треба, да гледаме и да трпиме замена на тезите, спинување, дрскост и бесрамност во јавната комуникација.
Со години слушаме како фашистите ги нарекуваат демократите и прогресивните луѓе токму со зборот фашисти. Видовме како најголемите зулумќари и апаши обвинуваат за корупција и криминал. Тие што правеа видео спектакли од брутални апсења во присуство на деца, тепаа, затвораа и убиваа од бес, суета и политички реваншизам – тие обвинуваат за реваншизам. Тие што крадеа и присвојуваа енергетски ресурси, токму тие протестираат за високите цени на струјата. Со раскошен возен парк, кабриолети и џипови, се разбира.
А бе, ајде, одете по ѓаволите!
Сите права се задржани. ЛИНК: Услови за користење, авторски права и заштита на приватноста. Тесктот е личен став на Авторот.
