Владата на украинскиот претседател Володимир Зеленски покани високи европски претставници во Киев на 9 мај како демонстрација на дипломатска сила против годишната воена парада во Русија на Денот на победата во Втората светска војна.
Министерот за надворешни работи на Украина, Андриј Сибиха денеска упати покана до своите колеги од Европската унија за време на состанокот во Луксембург, барајќи од нив „да покажат единство и одлучност пред најголемата агресија во Европа од Втората светска војна“.
„Зеленски сака да биде домаќин на лидерите на 9 мај од коалицијата која е подготвена да постави безбедносни гаранции за Украина по постигнувањето договор за можен прекин на огнот со Русија“, додаде Сибиха.
Извори за „Политико“ изјавија дека во тек се разговори шефовите на држави на ЕУ да ја посетат Украина на почетокот на мај, вклучувајќи го и идниот германски канцелар Фридрих Мерц, иако точната локација не е прецизирана, пренесе МИА.
