Според пријава од една граѓанка до ЦИВИЛ, на 27 февруари, околу 16 часот, на наплатната станица во Гостивар, полициска патрола го стопирала минибусот на фирмата Вапчаре кој превезувал патници Скопје-Струга и утврдила дека никој не носи маски. Полицајците почнале со пишување прекршочни пријави за патниците поради – неносење ковид-маска! Полицајците им ги собрале личните карти на патниците и им пишале пријави.
Никој не сакал да потпише затоа што никој не им кажал дека треба да носат маски и дека не било истакнато дека е задолжително носењето маски. Изговорот на полицајците бил дека на овој начин сакаат да ги едуцираат шоферите и фирмите. По тоа следеле уште реакции од патниците. На граѓанката, која извести за случајот, ѝ била врачена пријавата, каде што, на местото предвидено за сторител на прекршок стои „одбива“.
Во видео записот доставен од граѓанката може да се заклучи дека граѓаните се видно револтирани. Тие посочуваат дека е неправедно, дека никаде не се носат, ниту се бара од нив да се носат маски, наведуваат и примери за патување во странство, каде исто така нема барање за носење на маски. Ликовите на патниците и идентитетот на полицаецот во видеото се заштитени.
„Ќе одговори компанијата што не ја објавила пораката. Кога ќе отидете во фирмата Вапчаре сите заедно, и ќе им речете поради вас бевме казнети, сега вие да ни ја платите казната, или ќе им речете не патуваме повеќе со вас, има многу други фирми“, одговара службено лице при контролата на минибусот.
ЦИВИЛ се обрати до МВР за информации колку се запознаени со случајот, дали се работи за инцидентна полициска контрола за неносење маски и објаснување за законските мерки, односно доколку тие не се почитуваат зошто дури сега се реагира.
„Секторот за внатрешни работи Тетово Ве известува дека на 27-ми февруари годинава полициски службеници од Одделението за внатрешни работи Гостивар, на наплатна станица Гостивар, извршиле контрола на минибусот Вапчаре и притоа санкционирале вкупно 17 физички лица (патници) кои не носеле никаква заштита на лицето, односно заштитни маски. Постапувајќи согласно член 66 став 5 од Законот за заштита на населението од заразни болести“, е одговорот на МВР на поставените прашања од ЦИВИЛ.
Глобата која што треба да ја платат граѓаните изнесува 20 евра.
Сепак, во одговорот на МВР се наведува дека се санкционирани 17 физички лица, но нема информација за правното лице, освен на вработениот -шоферот – односно превозникот Вапчаре. Одредбата што ја наведува МВР, доколку се отвори на веб страницата на Министерството за здравство, ќе се види дека е дел од прекршочните одредби.
Член 66 се однесува на глоба во износ од 5.000 евра во денарска противвредност што ќе се изрече за прекршок на правно лице, а во став 5 се вели дека таа ќе се изрече доколку правното лице не спроведе изолација на лица заболени од заразни болести од членот 28 на овој закон.
На 3 мај 2022 Владата ја укина забраната за носење маски, освен во здравствените домови, аптеките, јавните превозни средства, односно автобус, воз, авион, такси, како и во установите за згрижување стари лица и лица со посебни потреби. Согласно законските одредби оваа мерка е сѐ уште валидна, што значи дека полициските службеници постапиле според законот.
Според информациите на ЦИВИЛ Медиа и теренската проверка, многу мал број граѓани ја почитуваат мерката за носење маски во јавен превоз. Она што е општа состојба е дека ниту еден превозник не бара носење на маски, ниту еден шофер не носи маски, ниту еден патник не е пуштен во автобус затоа што не носел маски и тоа важи за територија на цела држава.
Биљана Јордановска
монтажа: Ариан Мехмети
