Полскиот министер за надворешни работи Радослав Сикорски ја повика Европската Унија да покаже солидарност со Украина и да го усвои 18-тиот пакет санкции против Русија пред да заврши претседателството на Варшава со блокот на 1 јули, пренесува TVP Wold.
Најновите планирани санкции се насочени кон извозот на енергија на Русија, банкарскиот сектор и воената индустрија. Но, Унгарија и Словачка објавија дека нема да го поддржат пакетот, наведувајќи ја предложената забрана за увоз на руски гас почнувајќи од 2029 година.
Санкциите од страна на Европската Унија бараат едногласно одобрување од сите 27 земји-членки. Но, за време на состанокот на министрите за надворешни работи на ЕУ во понеделник, унгарскиот министер за надворешни работи, Петер Сијарто, рече дека Будимпешта и Братислава се спротивставиле на предлогот за санкции.
Сикорски го критикуваше тој став, велејќи:
„Некои земји се чини дека се исклучително приврзани кон руската сурова нафта и гас и се спротивставуваат на регулативите кои, всушност, би можеле да ги зголемат трошоците, но кои би го лишиле [рускиот претседател Владимир] Путин од можноста за финансирање на оваа криминална војна“ против Украина.
Тој додаде дека повеќето земји-членки на ЕУ ги поддржуваат санкциите и дека Европа мора да покаже единство со прекинување на руските извори на финансирање.
Намалување на средствата на Путин
„Ова значи дека е потребно да се изрази солидарност со инвадирана Украина, исто така и преку прекинување на средствата на Путин“, рече Сикорски.
Министерот за надворешни работи продолжи да изразува увереност дека санкциите сè уште можат да бидат одобрени пред Данска да го преземе ротирачкото претседателство со Советот на ЕУ од Полска на 1 јули.
Сикорски додаде дека на самитот на лидерите на ЕУ во Брисел во четврток, шефовите на влади би можеле да го поништат ставот сигнализиран од нивните министри.
Тој, исто така, рече дека Европа мора да ја преземе примарна одговорност за помагање на Киjiв додека пакетите за поддршка на САД се намалуваат.
Последниот пакет санкции на ЕУ беше усвоен во мај и вклучуваше проширени трговски забрани и нови листи на фирми поврзани со руската војска.
Д. Мишев
