Претседателот на Владата на Република Северна Македонија, Зоран Заев придружуван од заменик претседателот на Владата за европски прашања, Бујар Османи и министерот за надворешни работи, Никола Димитров беше пречекан од канцеларката на Сојузна Република Германија, Ангела Меркел пред почетокот на Конференцијата за Западен Балкан во Берлин.
Непосредно пред почетокот на Конференцијата, владината делегација оствари работен состанок со канцеларката Меркел на која главна тема на дискусија беа придобивките од Договорот од Преспа за стабилноста, соработката и мирот во регионот.
Заеднички беше констатирано дека Северна Македонија и Договорот од Преспа се позитивен пример на Балканот и дека тој успех е охрабрување за сите земји учеснички на Конференцијата за Западен Балкан.
Премиерот Заев и канцеларката Меркел ја истакнаа важноста на економските придобивки кои ги носи билатералната соработка меѓу Северна Македонија и Грција и потенцираа дека ваквите соработки треба да се интензивираат низ целиот регион.
На маргините на Конференцијата премиерот Зоран Заев се сретна со високата претставничка на ЕУ, Федерика Могерини.
На средбата, како што стои во владиното соопштение како позитивен пример за целиот регион бил посочен преспанскиот договор, но и успешниот прв круг од претседателските избори во земјава.
Заев и високата Могерини се согласија дека за стабилноста на регионот и особено за придобивките на граѓаните на Северна Македонија и на Грција после Договорот од Преспа, неопходно е земјата да биде поддржана и да продолжи уште побрзо на патот кон очекуваната европска интеграција.
Според весникот Фајненшл Тајмс, пораката на Меркел и Макрон до шесте земји аспиранти за членство во ЕУ е да ја одржуваат политичката стабилност со нивна помош. Мали се шансите за брзо приклучување на блокот, доколку не си ги средат работите внатре.
Според германските медиуми Ди Велт, Зи Дојче Цајтунг и ФАЦ, на самитот постои желба да и се помогне на земјата да добие почеток на преговори со ЕУ во јуни, а за таа цел, според весникот германската канцеларка по секоја цена сака да го убеди францускиот претседател Макрон.