Рускиот агресор изврши масовен ракетен и дронски напад врз Украина во текот на ноќта и утрото на 7 октомври. Според ажурираниот биланс што го соопшти претседателот Володимир Зеленски, загинале најмалку 11 лица. Погодени се станбени згради и инфраструктура во Кијив и повеќе области, а во Прилуки продолжува потрагата по луѓе под урнатините.
Прилуки: Пет загинати, меѓу повредените се и пет деца
Руска ракета утрово погоди петкатна станбена зграда во Прилуки, во Чернихивската област. Нападот се случил околу шест часот, додека жителите сè уште спиеле. Полицијата извести и за погодени Центар за детско и младинско творештво и претпријатие.
Според поновиот биланс, во Прилуки загинале пет лица, а 26 се повредени, меѓу нив пет деца. Спасувачите непрекинато ги расчистуваат урнатините, под кои сè уште може да има луѓе. Овие податоци го дополнуваат претходниот утрински извештај за четворица загинати и 20 повредени.
Комбиниран напад со ракети и 130 дронови
Украинските Воздухопловни сили соопштија дека Русија употребила ракети „Циркон“/„Оникс“, балистички ракети „Искандер-М“/С-400/KN-23, 48 крстосувачки ракети и 130 беспилотни летала, меѓу кои 46 „Шахед“ со млазен погон.
До 09:00 часот по украинско време биле неутрализирани 161 воздушна цел: 44 ракети и 117 дронови. Регистрирани се погодоци на 18 локации и пад на остатоци на уште пет. Главните правци на нападот биле Кијивската, Харкивската, Полтавската и Днипропетровската област.
Дир: На Украина ѝ е потребна ПВО, на Русија – санкции и одговорност
Украинската амбасадорка во Северна Македонија, Лариса Дир, во објава на платформата X порача:
„рф нападна со „Циркон“ и балистички ракети „Искандер“, 48 крстосувачки ракети, 130 дронови. Ракетен напад врз Прилуки–руските варвари утрово погодија станбена зграда додека луѓето сè уште спиеја. На 🇺🇦 ѝ е потребна ПВО, на рф–санкции и јасен сигнал за неизбежноста на одговорноста“.
Жртви и разурнување во повеќе градови
Според извештаите, во Кијив загинале две лица, а уште две во Олександрија. Во Кременчук се пријавени двајца загинати и осум повредени, со оштетени четири повеќекатници. Во Днипро се оштетени пет станбени згради, а во Запорижжја дрон погодил повеќекатница.
рф нападна со „Циркон“ и балистички ракети „Искандер“, 48 крстосувачки ракети, 130 дронови. Ракетен напад врз Прилуки–руските варвари утрово погодија станбена зграда додека луѓето сè уште спиеја. На 🇺🇦 ѝ е потребна ПВО, на рф–санкции и јасен сигнал за неизбежноста на одговорноста https://t.co/2rN6V8W8NA
— Larysa Dir (@dir_larysa) October 7, 2026
На фронтот: 202 борбени судири
Според утринскиот извештај на украинскиот Генералштаб, во текот на 6 октомври се регистрирани 202 борбени судири. Украинските сили пријавија 27 запрени напади на покровскиот правец, 14 руски напади на костјантинивскиот и 13 одбиени напади на хуљајполскиот правец.
Во истиот период, според украинската команда, руските сили извршиле 85 воздушни удари и употребиле 278 наведувани авиобомби.
ЦМ Деск
Овој преглед е подготвен според извештаите достапни претпладнето на 7 октомври. Податоците за жртвите и штетите се дополнуваат.
