Порталот Прес 24, на 3 октомври објави содржина со наслов „Анкета на „АКСИОС“: 59.3% поддршка за ВМРО-ДПМНЕ, а 10.7% се изјасниле за СДСМ“. Објавата е манипулативна и невистинита, бидејќи она што се тврди во насловот не се резултати од одговори на прашањето за кој кандидат ќе го дадат гласот граѓаните на изборите, или која партија ја поддржуваат, туку се однесува на прифатливост на слоганите на двете партии за испитаниците.
Прашањата од кои се извлекува насловот се „Дали сметате дека СДСМ и нивната коалиција се Најдобри? (поврзано со слоган на СДСМ за локалните избори), и „Дали би се согласиле дека треба да се Создаде нова иднина? (поврзано со слоган на ВМРО-ДПМНЕ за локалните избори)“.
Овие прашања се несоодветни за една предизборна професионална анкета, бидејќи се нејасни и наведувачки, што и не е чудно, кога доаѓаат организација за која речиси и да нема никакви јавни податоци за нејзината работа, и која за првпат пред јавноста излегува со анкета.
Затоа, граѓаните треба да внимаваат со вакви објави и анкети, особено во предизборниот период. Очигледно е дека тие не се прават за да ја информираат јавноста, туку за да создадат впечаток за предност на една или друга партија и да ги охрабрат или обесхрабрат нивните поддржувачи. Затоа, честопати во земјава имаме анкети што ги промашуваат целосно резултатите од изборите, кои се најрелевантната и најточната анкета за расположението на граѓаните.
Петрит Сарачини
