Под покровителство на градоначалникот Максим Димитриевски и Општина Куманово, со изложбата на портрети на 45 американски претседатели, дело на слободниот уметник од Прилеп, Борче Тодороски, Куманово одбележа 500 години постоење, а воедно им го честита националниот празник 4 Јули на САД и им заблагодари за нивната поддршка на нашата земја и на Куманово.
„Имав можност пред три години во непосредна комуникација на социјалните мрежи да се запознаам со Борче Тодорски што само го потврдува она одамна кажаното дека вистинските вредности се оставаат и дека вистинските уметници не знаат многу да зборуваат, но сериозно знаат да творат. Во таа комуникација го прашав како тоа вие творите. Ме повика на гости и го видов неговиот труд. Ми покажа дел од овие прекрасни портрети. Си велам ова е невозможно. Да, ми вели, потрошив повеќе од две години да ги насликам овие големи личности и великани. Вечерва пред нас имаме 45 портрети на американски претседатели. Некои од нив специфични по себе, но дефинитивно големи личности од светската историја… Голема е честа да се биде домаќин на една ваква прекрасна изложба и се надевам дека истата ќе поттикне многу млади луѓе да создаваат и творат во стилот на Борче Тодоровски“, изјави Максим Димитриевски, градоначалник на Општина Куманово отворајќи ја изложбата “Портрети на американските претседатели” на Борче Тодороски што ја отсликуваат американската историја и политика изработени во техниката графитен молив.Димитриевски рече дека околу 3.000 кумановчани работат во состав на цивилните служби за поддршка на мировните мисии на САД низ светот, укажувајќи на пријателстовото меѓу САД и Северна Македонија. Истовремено Димитриевски истакна дека овој настан е дел од одбележувањето на 500 години постоење на град Куманово. Тој се надева дека изложбата ќе може да ја види и американската публика.
Инсипирацијата за ваквиот начин на одавање почест на една голема нација доаѓа пред сè од проучувањето на американската култура и историја и нивниот придонес кон поставување на темелите на демократски модерни општества.
Самиот уметник се надева дека неговите дела ќе предизивикаат интерес и ќе наидат на добар прием не само кај американските пријатели туку и кај сите вљубеници на уметноста. Тодороски работел 2 години портретирајќи ги сите претседатели на САД, од Џорџ Вашингтон до актуелниот Доналд Трамп.
Биљана Јордановска