Aсоцијацијаta на независната културна сцена „Јадро“, реагира на одлуката на Владата за смеена на министерот за култура, Роберт Алаѓозовски, со министер од редовите на Беса.
„Ваквото однесување на Владата на РМ за нас претставува ништо помалку од јасен показател дека оваа Влада не само што не ја научила лекцијата од 11 годишното авторитарно владеење и девастација на целокупниот општествен и културен систем на вредности и институции во Македонија од страна на ВМРО-ДПМНЕ, туку и дека продолжува да ја третира културата како маргинална и неважна дејност вредна единствено за меѓупартиски преговори, коцкања и лицитирања со гласови“, стои во реакцијата на „Јадро“.
Поставувајќи го прашањето како Владата ќе ги реши деценските култруни проблеми, со ваквите одлуки, потсетуваат дека во изготвување на новата Стратегија за култура на Република Македонија учествуваа сите засегнати културни актери во државата, меѓу другото и од граѓанските активисти и независниот културен сектор, кои истовремено и дадоа поддршка на новата Влада на изборите.
Според Асоцијацијата, Влада со овој потег „го „продава“ ова клучно министерство како да станува збор за улична бизнис зделка, на партија чијашто идеолошка позиција, реторика и ставови во изборниот период се косат целосно со вредностите зад кои стоевме сите заедно, а кои се отелотворени во новата Национална стратегија за културен развој“
„Конечно, изразуваме ужаснатост и загриженост над целосната нетранспарентност при носењето на ваква одлука, при што шпекулациите во медиумите, неорганизираните изјави и фејсбук расправи беа платформата за јавна дебата и информирање… Бараме итно повлекување на оваа одлука на Владата… Бараме трајно сериозен и одговорен однос спрема Министерствтот за култура“, стои во нивното соопштение.
Инаку, „Јадро“ е асоцијација на независната културна сцена која брои педесетина членки, организации, неформални групи и поединци, културни работници, уметници и граѓански активисти.
Б.Ј.
