По објавата на фејсбук профилот на Шкодране Дардишта, што предизвика лавина од реакции и коментари на социјалните мрежи и по медиумите, во која таа порачува: „ Сѐ уште ги имаме чизмите на таван во старата куќа, за час ги вадиме белите патики. Ние не сме сираци, ние сме никнале по војна. Не играјте со оган, затоа што на крај сами ќе изгорите во нег“ – со осуда се јави претседателот на Демократската унија за интеграција, Али Ахмети. Според него, како што пренесува Сител, таквите изјави се спротивни на каузата на партијата.
– ДУИ во каузата ја има слободата и таквите изјави не се во интерес на партијата и на каузата, рече Ахмети пред состанкот на Генералниот совет на партијата во Тетово.
Претходно, од ДУИ за „Слободен печат“ посочија дека госпоѓата Дардишта зборувала за изборна битка.
– Госпоѓица Дардишта зборуваше за изборни битки, а не за војна. Таа сакаше да каже дека ДУИ е подготвена да се соочи на изборниот терен кога тоа ќе го посакаат опозициските партии. Тоа нема никаква врска со повиците за војна. ДУИ како апсолутен победник на локалните избори е подготвена секогаш кога и да се одржат парламентарните избори да влезе во трка и да излезе како победник. Чизмите подразбират подготвеност за изборен терен, рекоа од ДУИ за „Слободен печат“.
Во врска со случајот се јавија и од Министерството за здравство, од каде информираат дека Дардишта не извршува никаква функција во Министерстото , ниту во која било клиника на УК Центар „Мајка Тереза“, како што предходно објавија некои медиуми.
И Македонски Телеком, каде таа е актуелен член на управниот одбор на Македонски телеком од ДУИ. преку соопштение се оградија од, како што велат, приватниот став на Шкодране Дардишта изнесен на социјалната мрежа Фејсбук.
„Го осудуваме ваквиот личен став и наскоро очекуваме реакција од Владата, која ја постави Дардишта како независен член на Одборот на директори на Македонски Телеком“ – наведува македонски Телеком во соопштението.
„Лицата на јавни функции или на одговорни позиции во општеството или администрацијата, јавните личности и политичарите имаат обврска да бидат посебно внимателни во своите јавни настапи, без оглед на тоа дали се работи за приватен профил на социјалните мрежи или друг вид јавна комуникација“ – изјавија од ЦИВИЛ.
ЦИВИЛ, како организација за човекови права и слободи, која во континуитет спроведува мониторинг на општествените и политичките процеси, како и на дезинформациите и говорот на омразата. Организацијата остро го осудува секој облик на креирање и ширење дезинформации и омраза по било која основа и на било кој начин.
Д. М.