Свежо цвеќе пред грандиозниот споменик на Јосип Броз Тито во Скопје, македонското, а до него и некогашното југословенско знаме. На мала масичка отворено знамето на поранешна Социјалистичка Република Македонија, а врз него, до фотографијата на Тито, и дрвена изработка на култната Штафета. Меѓу нив, исправен и горд, што бил негов современик, Слободан Ценов, генерален секретар на Титовите леви сили, во став мирно му оддава почит на Тито, денеска на денот на неговиот роденден, што беше прогласен за Ден на младоста и државен празник на Југославија.
„Денеска е роденденот на незаменливиот водач и командант на вооружените сили на поранешна СФРЈ, Јосип Броз Тито. Овде во Скопје, Кочани и во Штип, Титовите леви сили му оддаваат достојна почит на великанот. Штафетата како продолжување на традицијата, денеска е во Белград и ќе биде предадена на Јошка Броз, внукот на Тито, којшто и денеска се декларира како Југословен и комунист. Од овој миг, порачуваме да има мир и разбирање, братство и единство, да се вратат сите вредности што ги имаше општеството, кога Тито беше претседател на поранешната СФРЈ“, порача со возбуда и трепет во гласот, Ценов.
До 1987 година, или седум години по смртта на Тито, се негуваше култот кон Штафетата. Поаѓаше од едно населено место од една од шесте републики или двете покраини, патуваше од раце во раце на девојки и момчиња, истакнати ученици, младинци, спортисти, музичари…, за на 25 Мај, денот на Титовиот роденден, еден од најдобрите младинци, му ја предаде Штафетата на Тито, како симбол на младите, прогресивни генерации коишто ветуваа дека ќе го следат неговото дело.
Слетот со богата кореографија и компонирана музика за таа пригода беше дел од раскошнтаа прославата, на која во еден глас, илјадници присутни на стадионот на ЈНА во Белград ја пееја „Другар Тито, ние Ти се колнеме!“
Великанот на комунистичката ера на овие простори, еден од творците на третиот блок во светот – Неврзаните земји, почина 1980 година, а единаесет години потоа, се распадна СФРЈ.
Од некогашната Социјалистичка Република Македонија, нејзините граѓани, успеаја со референдумот на 8 септември 1991, по мирен пат, како единствен пример од сите други југословенски републики, да ја создадат самостојна, независна Република Македонија.
Моника Талеска
