Вчера, како и секој последен четврток во месецот, во Собранието се одржа седница посветена на пратенички прашања. Тоа е важен инструмент на парламентарната демократија: избраните претставници имаат право и обврска да поставуваат прашања до владата и институциите, а носителите на власта имаат обврска да дадат одговори.
Но демократијата не завршува во собраниската сала. Прашањата не им припаѓаат само на пратениците. Граѓанките и граѓаните имаат исто толку важно право да прашуваат, да бараат одговорност, да посочуваат проблеми и да споделуваат искуства од секојдневниот живот.
Затоа, на крајот на работната недела, Прашањето на денот на ЦИВИЛ традиционално е во форма на Граѓански форум со целосно отворен карактер.
Прашањето е:
ПРАШАЊЕ НА ДЕНОТ / ГРАЃАНСКИ ФОРУМ: Која е вашата порака, барање или прашање до политичарите?
Граѓанките и граѓаните се поканети да споделат порака, барање или прашање што тие самите мислат дека е најитно – за нив, за нивната средина, заедница, работен колектив, семејство, општина, или за општеството и државата во целина.
Секое прашање има тежина. Секој проблем, колку и да изгледа мал, може да открие поголема неправда. Секоја порака може да отвори важна јавна дебата.
ЦИВИЛ е во постојана и секојдневна комуникација со стотици граѓанки и граѓани од целата земја. Пред неполни две години, беше воспоставена уште една форма на директна комуникација со јавноста – ПРАШАЊЕ НА ДЕНОТ, кое од понеделник до четврток отвора актуелни теми и прашања од јавен интерес.
Прашањата се однесуваат на политички, социјални, економски и општествени теми, но и на секојдневни проблеми со кои се соочуваат луѓето. Одговорите се отворени, директни и често мошне јасни. Бројот на коментари најчесто се движи од неколку десетици до неколку стотици дневно, а во повеќе прилики интересот беше толку голем што бројот на одговори надмина и илјада коментари за само еден ден.
Се разбира, оние што сакаат да споделат сензитивни информации, искуства и ставови, тоа можат да го направат и преку пораки на Фејсбук или по мејл на info@civil.mk. Идентитетот на тие што сакаат да останат анонимни се заштитува во најголема можна мера, а нивните информации често се основа за новинарски истражувања и стории.
Граѓанките и граѓаните одговараат гласно и јасно. За жал, особено во петочниот Граѓански форум, коментарите често откриваат гнев, разочараност и недоверба кон нефункционалните институции и празните ветувања на власта. Но, многу често, тие изразуваат и длабоко разочарување од опозицијата, од партиите и од политичарите воопшто.
Критиката е важна. Досетките, огорчените повици за одговорност, барањата за оставки, личните сведоштва и секојдневните маки на луѓето се дел од јавниот глас. Ставовите на луѓето, нивните судбини низ лавиринтите на институциите, сиромаштијата во која запаѓаат, неправдите што ги трпат – не може и не смее да се игнорираат.
Вчера во Собранието прашуваа пратениците. Денес, во Граѓанскиот форум на ЦИВИЛ, прашуваат граѓанките и граѓаните. И едните и другите прашања бараат одговори. Разликата е во тоа што граѓанските прашања често доаѓаат директно од животот – од сметките што не можат да се платат, од институциите што молчат, од неправдите што траат, од сиромаштијата, корупцијата, партизацијата и чувството дека политиката одамна се оддалечила од луѓето.
Нема лошо или добро време за поставување прашања. Секое време е вистинското кога се бара одговорност. А институциите и политичарите имаат обврска да одговорат – јасно, точно и навремено.
Можеби политичарите се обидуваат да ги контролираат медиумите, но граѓанките и граѓаните го имаат ЦИВИЛ за да ја повикаат власта на вистински одговори и одговорност. Затоа, коментирајте, прашувајте, посочете. Дајте пример, споделете искуство. Побарајте одговор.
Ние сме тука – заедно со вас.
ЦИВИЛ – Центар за слобода
Неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
