Врховниот суд вчера одлучи да им го замени притворот со куќен притвор на поранешниот министер за внатрешни работи Митко Чавков и пратениците Крсто Мукоски и Сашо Василески. Во Кривичниот суд, пак, имаше шест и пол часовно сослушување на струмичкиот бизнисмен Иван Николов Сачевалиев како сведок во случајот „Поткуп“, во кој обвинет е премиерот Зоран Заев.
Сачевалиев на рочиштето за „Поткуп“ рече дека снимката од ПИ мерките што била прикажана на телевизија не била целосна и дека откако ја имал опремата за снимање на него, го наведувал Заев да го каже тоа што е прикажано на снимката.
Пред судот Сачевалиев кажа дека Заев му барал три евра поткуп од метар квадратен – едно за него, едно за црквата и едно за партијата, што е различно од тоа што го напишал во изјавата во ЈО, дека му биле побарани три евра за изградба на црквата. Од ЈО го приложија на увид оргиналниот документ од изјавата на Сачевалиев. Тој уште еднаш потврди дека потписите на четирите страници од изјавата се негови, но оти текстот бил променет.
Премиерот Заев, по завршувањето на рочиштето, рече дека сме можеле буквално да видиме јасни, на неколку пати, како што рече, признанија од единствениот сведок во процесот, дека бил инструиран и дека бил под наредба на Јавното обвинителство и полицијата.
– Неколку пати кажуваше како ме местат и како наведувал да извлече зборови од мене, изјави премиерот Заев.
Нагласи дека сепак останува Судот да си ја донесе одлуката.
Во меѓувреме, Врховниот суд донесе одлука да им го замени притворот со куќен притвор на поранешниот министер за внатрешни работи Митко Чавков и пратениците Крсто Мукоски и Сашо Василески, кои ќе бидат пуштени од истражниот затвор во Шутка, откако поминаа три месеци во притвор по одлука на судија од скопскиот Кривичен суд.
Одлуката беше донесена по жалбите кои Чавков, Мукоски и Василески ги поднесоа на одлуките на Кривичниот и Апелацискиот суд, со кои им се одредуваше и продолжуваше притворот.
Врховниот суд одлучи од притвор да се пуштат и Митко Пешев, Душко Лазаров, Горан Ѓошевски, Оливер Поповски и Мунир Пепиќ, сите вработени во МВР, на кои исто така им е одреден куќен притвор.
По денешната одлука во притвор остануваат уште четворица осомничени за настаните од 27-ми април. Меѓу нив се членовите на патриотското здружение од Велес, Горанче Анѓелов и Илија Славевски.
Обвинителен акт за настаните од 27 април се уште не е поднесен, а рокот истекува за десетина дена.
Извор: МИА
