Празнично, како што доликува, Денот на македонската револуционерна борба е во знакот на ВМРО –ДПМНЕ, кое, по вчерашната седница на Централниот комитет на партијата, не се знае во кој правец ќе оди.
Пресуда за внатрепартиските предавници на ВМРО –ДПМНЕ
Лидерот на ВМРО –ДПМНЕ не присуствуваше на вчерашната седница на Централниот комитет на партијата. Во негово отсуство, разрешени беа потпретседателот на партијата и актуелен градоначалник на Кавадарци, Митко Јанчев, членот на Извршниот комитет Костадин Богданов, се поведе дисциплинска постапка за исклучување на Сашо Мијалков и Никола Тодоров, а истовремено се побара од пратениците кои гласаа за уставните измени да ги вратат мандатите.
Новиот потпретседателот на ВМРО-ДПМНЕ, Александар Николовски побара од осумте пратеници кои гласаа „за“ уставните измени да поднесат оставки од своите позиции, бидејќи работат спротивно на волјата на граѓаните.
Од друга страна, Митко Јанчев ќе ги тужи затоа што, според него, на вчерашната прес-конференција од Александар Николовски биле упатени ниски и агресивни обвинувања за закани, поткуп и криминал, кон Јанчев, рамо до рамо со Сашо Мијалков. Поради таквите навреди од Мицкоски и Николовски бара јавно извинување од двајцата.
„Во спротивно кон нив двајцата ќе поднесам приватни тужби за клевета и навреда на мојата личност“, изјави Јанчев.
Исклучувањето на Сашо Мијалков, Никола Тодоров, Митко Јанчев беше проследено со бројни коментари на социјаните мрежи, а најактивна беше твитер заедницата.
„Им пееја песни, им пишуваа книги, ги сликаа на платно, ги тетовираа… и сега ги исклучуваат“, „Се очекува исклучување на Гоце Делчев од ВМРО“, „Едвај чекам да го исклучат ВМРО од ДПМНЕ и да го вратиме на историјата. Нормално, забрана за користење во иднина“, беа дел од твитер коментарите.
Во медиумите денеска одекна вест дека СЈО го вратил одземениот пасош на поранешниот директорот на контраразузнавање Сашо Мијалков против кој има повеќе кривични пријави.
Од СЈО ја демантираа оваа вест: „СЈО досега не донело ниту една позитивна одлука по барањата за враќање за патните исправи поднесени од лица на кои истите им се одземени а против кои СЈО покрена кривични пријави“
Кривичниот суд исто така ја демантираше информацијата истакнувајќи дека не постапувал по барање за укинување на мерката за претпазливост на Сашо Мијалков.
#Кежо
Пред точно пет години, стотици граѓан(к)и, новинари и граѓански активисти беа спречени од страна на полициски сили да одржат мирен протест пред Музејот на македонската борба за државност и самостојност, поради казнувањето на новинарот Томислав Кежаровски.
ЦИВИЛ –Центар за слобода тогаш поведе меѓународна кампања под називот КЛИКНИ ЗА СЛОБОДА, заедно со „Репортери без граници“ – Германија, N-ost – Мрежа за известување за Источна Европа и Балканската истражувачка репортерска мрежа. Во заедничка реакција, овие организации оценија дека апсењето на Кежаровски е замислено со цел да го заплаши него, но и сите останати медиуми. Беџеви со слоганот Je suis Kezharovski, „Слобода за Кежо“ и други слогани се носеа низ целата земја. Тој стана еден од симболите на македонското новинарско востание.
Минатата година Кежаровски ја промовираше својата книга „Живот во кутија“, на чија промоција беа присутни сите пријатели на Кежаровски. Книгата на Кежаровски е многу повеќе од сведоштва за хоророт на Кежаровски и на неговото семејство.
Позитив на денот
Оваа година за најдобар ученик на теоретскиот оддел е награден Виктор Тошевски, ученик со оштетен вид.
ЦИВИЛ Медиа во соработка со граѓанскиот новинар Дамјан Темков, објави неколку стории за Виктор, неговите успеси но и секојдневните препреки со кои се соочува еден ученик со оштетен вид.
Музиката е животот на Виктор…“, вака пред седум месеци ЦИВИЛ Медиа заедно со неговиот професор по хармонија ја започна приказната на Виктор.
Сторијата ги разбуди институциите па веќе неколу дена по објавувањето на сторијата за Виктор реагираше неговото училиште од каде тој доби нов преносен компјутер.
Приказната на граѓанскиот новинар Дамјан Темков, професор во ДМБУЦ Илија Николовски Луј, за неговиот ученик Виктор Тошевски која предизвика бура од реакции во јавноста, но започна да ги буди и институциите беше и една од првонаградените стории на граѓански новинари кои ЦИВИЛ ги доделува на секои два месеци.
Б. Јордановска
фотографија во прилог на текстот: Јана Поповска/kolektif.mk
