ВЕСТ НА ДЕНОТ: Собранието го изгласа Законот за попис на населението со потребното мнозинство
Со 62 гласа „за“, без „против“ и „воздржани“, Собранието денеска го усвои Законот за попис на населението и домаќинствата, кој треба да се одржи во април годинава. Денеска само се гласаше за законот, а расправата заврши на 15 јануари, кога немаше кворум за гласање. Пратениците на ВМРО-ДПМНЕ не беа во салата за гласањето. Од најголемата опозициска партија претходно најавија дека ќе собираат потписи од граѓаните за поништување на овој закон.
Министерот за правда, Бојан Маричиќ денеска на својот фејсбук профил го поздрави донесувањето на Законот за попис во Собранието.
Резултатот од пописот, според министерот, ќе биде основна алатка за креирање развојни политики, а од него директна корист ќе има и бизнис заедницата.
„Сакам да ја поздравам одлуката на Собранието, кое предмалку го изгласа Законот за попис. Им порачувам на граѓаните да бидат спокојни и да им веруваат на институциите. Државниот завод за статистика и институциите се повеќе од подготвени за спроведување на пописот, а пробниот по оваа нова методологија веќе беше поздравен од Европската комисија. После речиси две децении државата конечно ќе спроведе ваква сложена статистичка операција, а резултатот од истиот ќе биде основна алатка за креирање на идните развојни политики. Директна корист од пописот ќе има и бизнис заедницата“, истакна Маричиќ на Фејсбук.
ФЛЕШ ВЕСТИ:
Рестораните и угостителските објекти од денеска ќе работат до 21 часот, со што престанува да важи одлуката што беше во сила во изминатиот месец за работа до 18 часот, по препорака на Комисијата за заразни болести за да се спречи групирање во празничкиот период и ширење на вирусот Ковид-19.
Откако српската премиерка, Ана Брнабиќ во интервју за српската телевизија „Хепи“ рече дека вакцините на „Фајзер“ не биле регистрирани во Македонија и дека тоа е проблем за испораката, министерот за здравство, Венко Филипче вели дека не постои законска пречка за прием на вакцините против Ковид-19 во нашата земја и дека првите дози на вакцината „Фајзер“ која е договорена во директни преговори со производителот, како и 8.000 дози вакцини кои од Република Србија треба да пристигнат во нашата земја со интервентен увоз.
Матуранти денеска не се вклучија во онлајн-наставата и во почетокот на второто полугодие од учебната година. Организирани од Средношколскиот сојуз, почнаа бојкот зашто бараат да полагаат два наместо четири (три екстерни и еден интернет предмет) од државната матура – спротивно на ставот на МОН дека оваа година нема да има измени во бројот на испити, но дека ќе се полага по скратени програми.
Министерката за труд и социјална политика Јагода Шахпаска информира дека дел од анализите во владините структури е и директната финансиска поддршка на лицата со попреченост во рамки на петтиот пакет мерки за справување со Ковид кризата. Според неа, во тек е анализа кои категории не биле воопшто опфатени со мерките.
Министерството за образование и наука, Бирото за развој на образование и членовите на работната група денес се сретнаа со наставници од сите општини во државата со што го продолжија широкиот консултативен процес во врска со предложените реформи во основното образование.
Обидот на одбраната за поврзување на возилото „опел омега“ и целата операција со структури на МВР, е целосно неточна теза и од правно-фактички и од правно логички-аспект, изјави денеска обвинителката Фатиме Фетаи во завршни зборови за случајот „Монструм“.
СЛОБОДНА ЗОНА
Кога Заменикот на Премиерот за корупција очекува да биде казнет за корупција некој висок функционер од власта.
„Двете партии кои пред една деценија фингираа oдложување на попис, денеска се сомневаат дека некој може да фингира бројки и проценти во пописот кој треба да се одржи во април. Замислете, дури и владиниот коалициски партнер ДУИ се сомнева на институциите кои сами ги водат, или се партнери во нивното раководство. На прв поглед може да ни изгледа на 10-годишните сценарија кога ДУИ со ВМРО-ДПМНЕ глумеа дека имаат несогласувања и тензии за да добијат гласови и да отфрлат одговорност. Но, овој пат не глумат, многу се искрени. Најискрено се наоѓаат во паника, и ДУИ и ВМРО-ДПМНЕ, бидејќи не се сфесни колку наши сограѓани се иселија од нивниот 10-годишен режим. Стравот од реалноста која би излегла на виделина беше вистинската причина и за одложување на последниот обид за попис. Немаше конфликт, туку многу добро слушавме во бомбите како се договараат во Собранието да одложи пописот“, пишува Арбен Зеќири во колумната „Ако пописот нè разочара, ВМРО-ДПМНЕ и ДУИ да одговараат за иселувањето“.
