ВЕСТ НА ДЕНОТ: Попишувањето на дијаспората се одвива со забрзано темпо
Попишувањето на дијаспората се одвива со забрзано темпо. До затворањето на ова издание на Дневникот на Цивил, попишани се 64.176 државјани на Северна Македонија кои живеат надвор од земјата, според изјавата од Државниот завод за статистика утрово. Апликацијата функционира беспрекорно, а интересот за попишување се зголемува од ден во ден.
Сепак, според извештаите од Мониторинг тимот на ЦИВИЛ, се води и кампања за бојкот на попишувањето на Македонците во дијаспората.
ИЗЈАВА НА ДЕНОТ: Царовска: Со образованието поставуваме основи за интеркултурност, родова рамноправност и инклузивност
„Уште од најмала возраст момчињата и девојчињата ги насочуваме кон родова нерамноправност и улогата на мажот ја поставуваме поинаку од онаа на жената. Основите на сé што понатаму ни се случува се во основното образование. Сите стереотипи против кои со години се бориме со законски решенија и акциски планови и стратегии, постојат како стереотипи и дискриминација и во учебниците и во наставните програми, и во континуитет продолжуваме да ги едуцираме нашите ученици на дискриминација, на нетолеранција, на родова нерамноправност“
„Политичките партии треба да поставуваат мерит системи во изборот кои жени се поддржуваат и одат напред и добиваат функции, но исто така и во делот на баланс семејство-работа. Задолжително треба да се направат механизми на поддршка на жените коишто сакаат да бидат активни, но од различни причини не можат. Ако системот не нуди поддршка, не само партиите коишто сакаат да ги поддржат жените туку треба да имаме услуги на локално ниво, училишта коишто се отворени во подолг период, градинките исто така да имаат смени, за да може сите подеднакво да вложат во својата кариера и да се развиваат“, укажа Царовска.
ЦИВИЛНИ АКТИВНОСТИ
ЦИВИЛ со дебата и во Гевгелија: Пописот е статистика, а не политика
По извонредните дебати во Штип и Гостивар, на рутата на јавни настани во организација на ЦИВИЛ се најде и Гевгелија. „Попис: Статистика, не политика“ е насловот на панел дискусијата што ќе се одржи и во Гевгелија, в среда, на 11 март 2021, во Домот на културата, со почеток во 13 часот.
Во согласност со мерките за заштита од Ковид-19, панел дискусијата ќе биде одржана без публика, но ќе биде пренесувана во живо на Фејсбук страницата на ЦИВИЛ, а содржините што ќе произлезат од панел дискусијата ќе бидат објавени на медиумската платформа на организацијата на македонски, албански и англиски јазик. Посебни видео прилози ќе бидат објавени и на YouTube каналот на ЦИВИЛ. Како и секогаш, редакциите со кои ЦИВИЛ има соработка се поканети да ги преземат сите медиумски содржини со соодветна атрибуција и линк.
Во фокусот на панел дискусијата е потребата да се одвои политиката од статистиката, бидејќи пописот тоа и е – статистичка операција, а не полигон за етно-политички пресметки. За јавноста е важно да се слушнат ставовите на учесниците од различни градови во нашата земја, да споделат информации за подготовките на пописот и неговото значење за развојот на општините, економијата, стопанството и градењето политики и практики на локално и национално ниво.
Панел дискусијата ќе трае еден час. За време на дискусијата, тимот на ЦИВИЛ ќе ги следи реакциите и прашањата на социјалните мрежи и дел од нив ќе ги пренесе до учесниците во дискусијата.
Настанот е дел од проектот „Граѓански објектив“, финансиран од Националната фондација за демократија (National Endowment for Democracy) од САД.
СКЕН – политички видео магазин: Пописот е од суштинско значење, треба да се одржи да видиме кои сме и што сме!
Политиката да се одвои од статистиката, бидејќи пописот тоа и е – статистичка операција, а не полигон за етно-политички пресметки. Гостиварчан(к)и се едногласни дека пописот треба да се спроведе и дека не треба да се бојкотира. Започнатиот попис е тема на ова издание на политичкиот видео магазин СКЕН.
ФЛЕШ ВЕСТИ
Правда– Во Кривичниот суд – Скопје денеска продолжи судењето за предметот „Ласкарци”, кој се однесува на автобуската несреќа што се случи пред две години во која загинаа 16 лица, а над 30 беа тешко повредени.
По испрашување на сопственикот на „Дурмо Турс“, судењето за „Ласкарци“ продолжува на 23 март.
Адвокатот на Јордан Камчев, Тони Менкиновски беше дел од тимот на ВМРО -ДПМНЕ кога власта и опозицијата го договараа носењето на Законот за Јавно обвинителство. Опозицијата, а вклучително и Менкиновски се противеа на изгласување на Законот во парламентот.
Општество– Во Центарот за обука „Д-р Џозеф Крузел“ во скопската касарна „Гоце Делчев беше промовиран новиот софтвер за тестирање на знаењата на припадниците на Армијата и вработените во одбраната на англискиот јазик, согласно НАТО стандардот, СТАНАГ. Од овој месец започнува официјалната употреба на компјутерскиот софтвер за тестирање по англиски јазик, со што ќе се овозможи сертифицирање поголем број персонал со соодветно ниво на познавање на англискиот јазик
КОВИД-19- Вакцина против Ковид-19 досега примиле 4 782 здравствени работници.
Министерката за одбрана Радмила Шекеринска очекува на седница на Влада да се дискутира за прашањата поврзани за добивање, пристигнување и исполнување на условите во однос на вакцините од КОВАКС механизмот.
Зелени– Министерот за животна средина и просторно плaнирање Насер Нуредини, директорот на Агенцијата за планирање на просторот Андријана Андреева и раководителите на осумте Центри за развој на планските региони, денеска потпишаа Меморандум за соработка, со кој сите страни ја изразија подготвеноста за соработка во процесот на изработка на Просторен план на Република Северна Македонија. Просторниот план претставува национална стратегија за просторен развој и дава насоки за организација, користење, заштита, уредување и управување со просторот на државата. Процесот на изработка на Просторниот план,ќе биде инклузивен и ќе ги вклучи сите релевантни институции во државата, како и невладиниот сектор, а ќе биде усогласен и со регионалното просторно планирање преку консултации со соседните земји и усогласување на пограничните и прекуграничните активности.
СЛОБОДНА ЗОНА
„А, притворањето на г. Камчев ќе биде предмет на шпекулации, правни полемики за надлежноста и појаснувања според кои правни членови е тоа сторено. Како што знаеме, г. Камчев е комплексна деловна и политичка личност, со компликувани интереси далеку зад границите на државава. Логична е претпоставката дека некој меѓународен контакт или комуникација на Камчев влегла во „радарот“ на АНБ на начин и со содржина што ја „активирало“ постапката за негово притворање. Впрочем, самиот Камчев ја активираше (тогашната) АНБ во аферата „Рекет“ со која се обиде да ја сруши власта во Македонија, што никому, тогаш, не му пречеше“ пишува Сашо Орданоски во колумната „Луди, збунети, притворени и пребегани“
И.К.
