ВЕСТ НА ДЕНОТ: Во владината програма „Акција 21 – европски стандарди дома!” прочистувањето на правосудството е со врвен приоритет
Претседателот на Владата на Република Северна Македонија Зоран Заев денеска одржа прес конференција на која ги презентираше проектите и програмите од владината „Акција 21 – за европски стандарди дома!” за 2021 година.
Во „Акција 21“ се вклучени 10 приоритети, а број 1 на листата е прочистувањето на правосудството.
Во финалето сме на длабоките и суштински реформи во правосудството преку ефикасно и објективно прочистување на судството и обвинителството. Стигнавме до тука после тешка битка со противниците на правдата. За некои од нив, за Мицкоски на пример, во неколку наврати јавно чувме дека се единствени на браникот на криминалот – го знаевме тоа, затоа беа против Законот за јавно обвинителство кој како владејачко мнозинство го донесовме во Собранието, изјави премиерот Заев.
Како резултат на тој закон, предметите за висока корупција се живи и тие добиваат и ќе добиваат судски разрешници. Високи функционери, министри, веќе издржуваат затворски казни за тешки кривични дела. Изминатава година од страна на Судскиот совет биле покренати 80тина предмети, а осум судии биле разрешени. Процесите се почнати, нема назад.
ИЗЈАВА НА ДЕНОТ: Целта е пописот веќе никогаш да не се третира како политичко прашање, вели Заев
„Имаме за цел со Предлог-законот за попис, оваа статистика операција сега и во иднина да не се третира веќе како политичко прашање. Пописот ќе се спроведе, не затоа што Заев така рекол или затоа што Мицковски така сака. Пописот ќе го има затоа што развојот на земјата нема да биде можен без резулатите од него. Затоа што на граѓаните, бизнисмените и институциите им требаат точни статистички податоци за нашето население“, додаде Заев.
ЦИВИЛНИ АКТИВНОСТИ
Стојановски: Улогата на новинарите е клучна во борбата против инфодемијата
Бачовска: Со медиумска писменост против дезинформациите
Сарачини: Со брзи и навремени информации ќе се спречи протокот на дезинформации
ФЛЕШ ВЕСТИ
Министерството за труд и социјална политика заедно со UNDP ја креираа првата мобилна апликација за помош и поддршка на жртвите на насилство ,,Биди безбедна”, достапна на три јазици: македонски, албански и ромски.
Министерството за животна средина и просторно планирање и Сојузот на стопански комори денеска потпишаа Меморандум за соработка. Целта е изнаоѓање ефективни решенија за заеднички еколошки прашања кои ја поддржуваат потребата за одржлив развој.
Економијата се проектира да расте со стапки од 4 – 5 отсто од БДП во следните пет години или двојно повисоки во однос на изминатиот период, додека буџетскиот дефицит или јазот помеѓу приходите и расходите ќе се намалува до 2 проценти од БДП во 2025 година, односно ќе биде под Мастришкиот критериум, истакна министерот за финансии Фатмир Бесими.
Нема сомневање дека ние сме подготвени за почеток на преговори за членство со ЕУ и нема сомневање дека било какво одложување за почеток на прегворите е голема грешка, изјави денеска во Виена шефот на дипломатијата Бујар Османи на прес-конференција со неговиот австриски колега Александер Шаленберг.
Владата на Република Северна Македонија потсетува дека граѓаните, кои ќе добијат 6.000 денари еднократна поддршка, истата може да ја користат во кој било период без рокови и ограничувања. Станува збор за околу 300.000 граѓани кои средствата ќе ги добијат на трансакциска сметка.
Министерството за здравство соопшти дека на Главниот координативен кризен штаб е усвоен заклучок за нови рестриктивни мерки, односно за забрана за летови од и кон Велика Британија до крајот на годинава.
СЛОБОДНА ЗОНА
„Таман кога помисливме дека, барем за годинава, Софија малку ќе нè одмори од својот антиталент за толкување на политиката за добрососедство, гледаме дека вревата од дуетот Каракачанов-Захариева во Бугарија по повод нивното фијаско со агендата за ЕУ проширувањето на Балканот, не престанува. Иако сме ние и Албанија директните жртви од анти-европската политика на Бојко Борисов, тие имаат возбудена потреба да се дообјаснуваат, нервозно да се правдаат и понатаму да ги ескалираат навредите упатени до нас. Зошто?“, пишува Сашо Орданоски во колумната „Летаат во авион Тито, Хитлер и Захариева…“.
„Севкупните реформи во образовниот процес треба да резултираат со изградба на самосвесни членови на општествената заедница што ги препознаваат главните прогресивни текови кај нас и во светот и подготвување на стручни кадри што ќе бидат носители и на двата процеса –технолошкиот и општествениот – Стипе Шувар, претседател на државната комисија за реформи во образованието на Југославија, автор на научниот труд „Насоченото образование како одговор на општествените и економските предизвици“, Загреб 1982 година“, пишува Војо Маневски во колумната „Учење, научување, а знаење?“.
