ВЕСТ НА ДЕНОТ: Приведени четири лица во врска со случајот „Јавна соба“, можно е целосно блокирање на апликацијата „Телеграм“
„Доколку апликацијата Телеграм не го затвори каналот Јавна соба, каде се сподеува порнографска и приватна содржина од наши граѓани, како и детска порнографија, ќе ја разгледаме и опцијата за блокирање или рестрикција на користењето на оваа апликација во Северна Македонија, сè додека не почнат да соработуваат со нас, со единствена цел да се затвори проблематичната група и да ни помогнат во откривање на идентитетот на оние кои споделуваат слики и прават кривично дела. Нам како Влада ни на крај памет не ни паѓа да цензурираме комуникација, но ова е нешто друго и мораме да си ги заштитиме своите граѓани. Денес ова се случува на Телеграм, а утре можеби на некоја друга платформа, затоа ние имаме задача и обврска да направиме сè да обезбедиме соодветна реакција и од оние кои ги создале овие платформи, каде се случуваат вакви кривични дела“, пишува Заев.
ИЗЈАВА НА ДЕНОТ: Маричиќ: Случајот „Јавна соба“ ќе биде катализатор за побрза измена на законите и за подигнување на јавната свест
ФЛЕШ ВЕСТИ
Владата на Република Северна Македонија на синоќешната 42 редовна седница, ја разгледа и ја усвои Информацијата за набавка на САРС-КоВ-2 инактивирана вакцина против КОВИД-19.
Поранешниот претседател Ѓорѓе Иванов, треба да се појави како сведок на едно од следните рочиштата за „Организатори на 27 април“, иако адвокатите на одбраната најавија повлекување на дел од нивните сведоци. Следните рочишта се закажани за наредната недела, пренесува Радио Слободна Европа.
„Оваа мутација на вирусот не можеше да се избегне и веројатно ќе се случи во сите земји во светот. Таа има побрза трансмисија за 70 проценти, но нема простор за паника, остануваме внимателни. Штом е детектирана на едно место мутацијата веројатно дека ја има и на други места. Мутацијата не мора да е секогаш увезена од некои од земјите“, истакна министерот за здравство Венко Филипче во врска со детектираниот британски сој на вирусот во земјава.
Министерството за здравство информира дека вчера испратило писмо до Европската комисија за резервација на најсофистицираната моноклона комбинирана терапија на антитела за третман на пациенти заболени од Ковид-19, со „коктел“ од „casirivimab” и „imdevimab”.
Два неславни рекорда сруши Македонија на Индексот за перцепција на корупцијата за 2020 година на Транспаренси Интернешнл (ТИ). Заедно со Босна и Херцеговина, Македонија се наоѓа на 111 место од вкупно 180 рангирани држави на овој индекс. Воедно, на Индексот за 2020 година Македонија го бележи најнискиот резултат и најниското рангирање досега од 2001 година, кога бевме за првпат рангирани на Индексот за перцепција на корупцијата, информираат од Транспаренси Интернешнл-Македонија.
Скопското обвинителство денеска поднесе до Кривичен суд Скопје обвинителен акт за случајот на „Мавровка” во кој инвеститорот бесправно градеше објект од тврда градба кој потоа беше урнат од надлежните органи.
СЛОБОДНА ЗОНА
„На десетина месеци пред годинешниве локални избори, впечаток е дека добар дел од гласачкото тело нема да биде расположено за влегување во уште еден изборен циклус по добро утврдените „слоновски патеки“ на кои ќе се применуваат старите партиски предизборни методи: натпревар во понуди до гласачите во кои кандидатите, од една страна, жестоко меѓусебно лично ќе се напаѓаат и навредуваат за тоа кој каков е (и чиј партиски лидер е поголем криминалец, предавник, патриот и сл.); и, од друга страна, кој ќе вети поголеми локални „лажги со опашки“ за остварување на сечии (и ничии) желби по македонските општински друмови и сокаци“, пишува Сашо Орданоски во колумната „А да размислевте за поинаков локален изборен настап?“.
„Божјата волја е неразбирлива за нас смртниците, ама исто е неразбирлива човечката темна страна на самоуништување на сопствениот род. Не е тешко зад историските анали на големите војсководци да се прочита – освоиле, завладеале… Зад овие едноставни зборови најчесто се крие уништување на цели народи и цивилизации. Цезар ја освоил Галија, а убил милиони Келти што не сакале да бидат дел од неговиот историски успех. Атила овојувал цели народи, оставајќи ги на големи човечки ридови телата на убиените. Џингис Кан, Кортес, Наполеон, сѐ се тоа историски личности зад кои останале милиони жртви“, пишува Војо Маневски во колумната „Шалом Ефраим“.
„Еј… влегов во соблекувалната од салата и те сликав без марамата и облеката, на сите ќе им ја покажам сликава, ако…” И ја покажа… слика од полугола тинејџерка која скришно ја сликал. Срамот и агонијата која ова девојче го доживеа, доведе и до обид за самоубиство. А кога го пријави случајот во полиција, хоророт доби институционална рамка. Додека чекаше институциите да се помрднат, сликата се праќаше по групи, а можеби и во оваа одвратна „јавна соба“, пишува Мерсиха Смаиловиќ во „Јавна соба“ = „Јавна срамота“.
