ВЕСТ НА ДЕНОТ: Постигнат договор меѓу Владата и Сојузот на средношколци
Два екстерни испита, а третиот да се трансформира во интерен испит, формирање на работна група меѓу Бирото за развој во образование во надлежност на Министерството за образовани и наука и Сојузот на средношколци, која ќе одлучува за кратење на програмите за екстерни испити, како и матурата да започне една недела подоцна, односно наместо од 29 мај, како што беше предвидено, да започне од 5 јуни, се дел од решенијата за кои се согласни и Владата и Сојузот на средношколци.
Работната група ќе биде составена од претставници на Бирото и од Сојузот и наставници номинирани од Сојузот на средношколците. Со неа ќе претседава претставник од канцеларијата на претседателот на Владата, а целиот овој процес треба да заврши некаде до средина на март.
Премиерот Зоран Заев денеска во изјава за медиумите по средбата со претставници на Сојузот на средношколци, рече дека низ дијалог е најдено квалитетно копромисно решение со кое се гарантира квалитет на матурскиот испит со кој се овозможува секој матурант да може да се запише на факултет овде во државата и надвор од неа.
– Потребно беше прилагодување на концептот на државната матура заради влијанието на пандемијата врз образованиот процес и врз основа на заедничката размена на аргументи и за нас е прифатливо се што е во нивна полза. Беше потребно да излеземе во пресрет и да го најдеме најдоброто можно решение, рече Заев, додавајќи дека нужно било државната матура да претрпи измени.
ИЗЈАВА НА ДЕНОТ: Заев: Како одговорна Влада инвестираме во младите луѓе и водиме грижа за квалитетно образование и понатамошен напредок
Премиерот Заев изрази задоволство што заедно низ дијалог со средношколците се изнајде компромисно решение со кое се гарантира квалитет на матурскиот испит со кој се овозможува секој матурант да може да се запише на факултет овде во државата и надвор од неа.
„Потребно беше прилагодување на концептот на државната матура заради влијанието на пандемијата на образовниот процес, и врз основа на заедничката размена на аргументите и следејќи го примерот од останатите европски држави за нас е прифатливо сѐ што е во нивна полза. Како одговорна Влада инвестираме во младите луѓе и водиме грижа за квалитетно образование и понатамошен напредок“, рече премиерот Заев и додаде дека ќе се формира работна група помеѓу Бирото за развој на образованието во надлежност на Министерство за образование и наука, и Сојузот на средношколците, која што ќе одлучува за кратење на програмите за екстерните испити. Со работната група ќе претседава претставник од Канцеларијата на Претседателот на Владата и целиот овој процес треба да заврши до средината на март.
ФЛЕШ ВЕСТИ
Образование -Груби, Царовска и Адеми, се договориле дека со учебникот по географија за втора година средно, како и со другите учебници, ќе се примени членот 26 став 2 од Законот за учебници.
ВМРО-ДПМНЕ– Иницијативниот одбор за свикување на вонреден конгрес на ВМРО-ДПМНЕ, односно противници на раководењето на Христијан Мицкоски со партијата, го повика претседателот на партијата да се појави на 17-от Вонреден конгрес на ВМРО-ДПМНЕ му порачаа дека партијата има обврска да ги врати загубените 150.000 гласови што „испариле“ од изборите во 2016 до изборите во 2020 година.
Економија -Ќе се отпишуваат каматите на долговите на граѓаните направени до ноември 2020 година, а обврска на граѓаните е да ја платат главнината на долгот
Избори– Заев апелира до ДИК брзо да влезе во постапката за набавка на апарати за гласање со отпечаток од прстот, за да може да се исполни ова законски вградено решение, затоа што постои во Законот.
СЛОБОДНА ЗОНА
„Всушност, никој од соседите на Косово не е воодушевен од победата на Курти. За Србите, тој ќе биде помалку посакуваниот „непријател“, од досегашниот „непријател“, Хашим Тачи, кого добро го знаеја. Додуша, самиот Курти не е непознат за српската власт, уште од времето кога како 24-годишен студентски лидер го уапсија во 1999 година, за време на 78-дневниот жесток конфликт помеѓу НАТО и Србија заради Косово“, пишува Сашо Орданоски во денешната колумна „Албин Курти и дилемата за Робин Худ“
„Во Македонија постоеја одреди и баталјони на НОВ кои учествувале од пролет 1944 година во борби за конечно ослободување, а кои делувале дури и на подрачјето на Србија и користени се во акциите во Србија. Под налетите на Црвената армија владата во Софија кон крајот на август се прогласи за неутрална, а после септемврискиот преврат во Софија 1944 година, новата бугарска власт ѝ нареди на Петтата армија да ги нападне довчерашните сојузници Германци. Така што, реално гледајќи, освен што ја премолчува окупацијата на Македонија, бугарската комунистичка историографија ја глорифицира улогата на Бугарската народна армија во завршните операции за ослободување на Југославија, а го потценува учеството на НОВЈ, сè на сè, за Бугарија би можело да се каже дека само осум месеци била дел од антифашистичкиот фронт“, пишува Александар Н. Писарев во анализата „ДОСИЕ: Македонско-бугарски односи под рефлектор (2)“
„Предлогот за внесување етничка припадност привремено ги стави под сенка другите прашања како што е очекувањето на вакцините против Ковид-19, реформите во судството, „вработувањето“ на административците, реформите во образованието, па дури и бугарската блокада за почетокот на преговори за членство во ЕУ, а привидно предизвика и ретко согласување меѓу неколку политички ривали.
Евентуалната измена на Законот за лична карта најверојатно нема да предизвика големи промени – ќе останат дежурните „негуватели“ на високи национални чувства и „чуварите“ на државното „единство“ како и секогаш…“ – анализа „Етнички“ лични карти, чекор поблиску или подалеку од граѓанскиот концепт на државата?
Со години наназад, ЦИВИЛ ја следи проблематиката поврзана со пописот на населението и констатира дека оваа тема се политизира и се злоупотребува за политички цели и влошување на меѓуетничките односи. Организацијата е меѓу првите кои во својата програма ја вклучија заложбата да се објасни вистинската потреба и начинот на спроведување на пописот, наспроти манипулациите и политичките злоупотреби. Во ова досие се поместени најважните настани и ставови поврзани со темата: Попис 2021. Анализа – Досие: Попис на македонски начин, меѓу статистиката и политиката
„Езерото „Треска“ во Општина Сарај, Скопје каде е прогласена слободна туристичка зона (како велат новинарите, а не може да се направи увид во таа одлука) стана тема на нашата реалност која е замаглена и оптеретена со перманентна узурпација на зелените простори перцепирани како слободни. Законски предвидената процедура веројатно била испочитувана и помината, но етичкиот момент во нашето однесување изостана. Многу е битно што езерото е градено од самопридонес, а тоа значи негување на човечкото на колективно ниво.“, пишува Даница Павловска –Циги во колумната Езерото Треска…
„Ако влезеш во некое наше просечно училиште, во некој поголем провинциски град и сликата ќе ти биде појасна. Најголем број од зградите се од осумдесеттите години и се со модернистичка функционална архитектура. За тоа време потполно прикладни на потребите. На нив веднаш можеш да приметиш колку пати се реновирани аулите, ходниците или самите училници.“, пишува Војо Маневски во колумната Кодекс ирање
Дијана Тахири
