Украина може да постигне траен мир со раководството на САД, но тоа бара зголемен притисок врз Русија и веродостојни безбедносни гаранции, напиша шефот на претседателската канцеларија Андриј Јермак во написот за мислење објавен од Гардијан на 11 март.
„Додека пристигнувам во Џеда, Саудиска Арабија, прекинот на огнот во тригодишната војна што Руската Федерација ја водеше врз мојата земја никогаш не изгледаше поблиску“, напиша Јермак.
Како што пренесува Кијив индипендент, Јермак сепак истакна дека дипломатијата сама по себе нема да донесе прекин на огнот – посилен политички и финансиски притисок врз Русија е од суштинско значење за да се спречи идното обновување на агресијата.
„Никој не сака сегашната војна да заврши повеќе од нашиот народ – но мора да се најде мир кој е праведен и одржлив“, додаде тој.
Јермак ги наведе клучните услови неопходни за одржлив мир, вклучително и безбедносни гаранции за Украина, построги европски санкции против Русија и заплена на руски замрзнати средства за поддршка на Украина.
„Европа не може да дозволи прекин на огнот што служи само за да и дозволи на Русија повторно да се вооружи, да ги обнови своите сили и да се врати за повеќе украински земји и ресурси“, предупреди тој.
И покрај повиците на Јермак за вклучување на САД во безбедносните гаранции, претседателот Доналд Трамп одби да понуди такви гаранции, велејќи за време на неговиот состанок на 28 февруари со претседателот Володимир Зеленски дека Европа треба да преземе одговорност за безбедноста на Украина.
Јермак ја поздрави европската иницијатива „Rearm Europe“, која вклучува до 150 милијарди евра (163 милијарди долари) за колективни трошоци за одбрана и дополнителни 20 милијарди евра (21 милијарда долари) за воените потреби на Украина.
Официјалниот претставник, исто така, ја истакна важноста на неодамна одобрениот 16-ти пакет санкции од ЕУ, кој ги проширува извозните ограничувања и го таргетира рускиот увоз на алуминиум.
Колумната беше објавена кога делегатите на Украина и на САД ги започнаа разговорите во Џеда на 11 март. Состанокот може да ја обликува идната поддршка на Вашингтон за Кијив и напорите за ставање крај на војната.
Во украинската делегација се Јермак, министерот за надворешни работи Андриј Сибиха, министерот за одбрана Рустем Умеров и заменик-началникот на Генералштабот на Зеленски, Павло Палиса.
Делегацијата на САД ја предводат државниот секретар Марко Рубио и советникот за национална безбедност Мајк Волц.
Разговорите во Саудиска Арабија се во тек, со американски и украински делегати кои моментално зборуваат во конференцискиот центар во хотелот Риц Карлтон во Џеда
Помошникот на претседателот Зеленски рече дека состанокот започнал на „многу конструктивен“ начин откако американскиот државен секретар Марко Рубио изјави за Би-Би-Си дека состанокот ќе биде „добар“.
Состанокот следи по серијата напади со беспилотни летала врз Русија во текот на ноќта, во кои загинаа најмалку три лица, според официјални лица.
Драган Мишев
