Декларацијата за соработка во областа на одбраната меѓу Албанија, Хрватска и Косово е потпишана на 18 март 2025 година во Тирана. Според јавно достапните информации, документот предвидува зајакнување на одбранбената и безбедносната индустрија, зголемување на воената интероперабилност преку заеднички обуки и вежби, спротивставување на хибридните закани, како и унапредување на стратешката безбедност и поддршка на евроатлантската интеграција.
Иницијативата е претставена како отворена за други земји-членки на НАТО во регионот, што уште повеќе го отвора прашањето за улогата на нашата држава во ваквите процеси. Затоа, го поставивме прашањето:
Зошто Република Северна Македонија не е дел од оваа регионална иницијатива за одбранбена соработка во рамките на НАТО?
Прашањето го испративме до претседателката Силјановска-Давкова, премиерот Мицкоски, министерот за одбрана, Мисајловски, и министерот за надворешни работи, Муцунски.
Претседателката го избегна одговорот. Според одговорот што беше испратен до ЦивилМедиа, “нашата држава има активен придонес во безбедноста на регионот“.
„Македонската надворешна безбедносна политика е целосно усогласена со заедничката надворешна и безбедносна политика на Европската Унија. Како членка на НАТО нашата држава има активен придонес во безбедноста на регионот. Истовремено, е активна и во Источното крило на Алијансата, преку учество на македонската Армија во мисии во регионот и во поголем број регионални безбедносни иницијативи, како и развиена билатерална безбедносна соработка со секоја од земјите од регионот“, се вели во одговорот за ЦивилМедиа од кабинетот на претседателката.
Во продолжение на одговорот, се наведуваат низа иницијативи од областа на одбраната со кои нашата земја учествува како членка на НАТО.
„Примери се учеството во мисиите на ЕУФОР- АЛТЕА, каде партиципираме заедно со други земји сојузнички на Косово и во Босна и Херцеговина, а заедно со земјите од регионот меѓу кои и со Албанија и Хрватска дел сме и од поголем број регионални безбедносни иницијативи како Процесот на соработка меѓу министерствата за одбрана на Југоисточна Европа (SEDM), САД-Јадранската повелба (А5), Форумот на началници на Генералштаб (Б9), Балканските медицински наменски сили, и RACVIAC – Центарот за безбедносна соработка“, се вели во одговорот на прашањето од ЦивилМедиа до претседателката Силјановска Давкова, која воедно е и врховна командантка на вооружените сили.
Сепак, конкретното прашање остана неодговорено. Тоа не се однесуваше на тоа каде сè учествува Северна Македонија како земја членка на НАТО, туку зошто не е дел од регионалната иницијатива за одбранбена соработка.
До моментот на објавување на овој текст (10 април, 14:45 часот), без одговор останаа премиерот Мицкоски, министерот за одбрана, Мисајловски, и министерот за надворешни работи, Муцунски.
Џабир Дерала
Веднаш по објавата на овој текст пристигна допис од претседателскиот кабинет.
– Во однос на објавениот текст со наслов Претседателката Силјановска Давкова избегна да одговори зошто Северна Македонија не е дел од регионалната иницијатива за одбранбена соработка меѓу Хрватска, Албанија и Косово“, Кабинетот на Претседателот ве замолува да го корегирате насловот на текстот, согласно правото на исправка. Одговор на Вашето прашање е испратен и не е избегнат одговор, како што наведувате во насловот, пишува во експресната реакција веднаш по објавување на текстот.
Нашиот одговор е во текстот под наслов „Кабинетот на Претседателот побара исправка на насловот на текстот со прашањето зошто Северна Македонија не е дел од регионалната иницијатива за одбранбена соработка меѓу Хрватска, Албанија и Косово: Одговор е испратен, не е избегнат!“
Поврзани содржини:
