Иако до денеска шансите дека ВМРО ДПМНЕ и ДУИ ќе седнат на преговарачка маса се чинеа речиси невозможни, двете политички партии излегоа со став дека преговорите најверојатно ќе започнат во текот на неделава. Сепак, засега и ДУИ и ВМРО-ДПМНЕ остануваат на своите децидни ставови.
Иако од двете партии не откриваат ништо подетално, Трајко Вељановски во интервју за ТВ Сител изјави: „Убеден сум дека во наредниот период, до 29-ти јануари, ќе се затворат сите отворени прашања: најпрво, завршување на конститутивната седница, и создавање на влада. Мандаторот Никола Груевски има 20 дена да ја состави владата. Имаше овие денови некои условувања, дојдени од политичка партија, имаше одговор од ВМРО-ДПМНЕ, односно од мандатарот кој ја претставува партијата и коалицијата, и се надевам дека надвор од она што беше почетно искричење, согласно со Уставот и законите, во наредниот период, ќе започнат преговори“.
Вељановски најави и дека по 23-ти јануари ќе продолжи и конститутивната седница на Собранието каде ќе се избира претседател на новиот парламент. Партиите засега не соопштуваат дали во нивните партиски органи дискутирале за имињата кои би ги предложиле за оваа функција.
Од ДУИ велат дека својата агенда за преговорите ја засноваат на Платформата на трите албански политички партии и на одлуките на централното раководство. И ДУИ очекува дека во текот на неделата конечно ќе започнат преговорите.
