Иако по синоќешната седница на Централното претседателство на ДУИ донесе одлука да го овласти лидерот на партијата Али Ахмети за потписите – со кои СДСМ треба да го добие мандатот, денеска потпаролот на партијата, Бујар Османи изјави дека остануваат и други прашања до конечната одлука.
„Од утре продолжуваме со дебатата во Претседателството, се разбира, претседателот Ахмети има и статутарно право, доколку одлучи да даде поддршка, тоа може да го направи и без да го свика претседателството, бидејќи има таква согласност“, рече Османи.
Од СДСМ, пак, денеска повторуваат дека очекуваат ДУИ да им ги даде потписите, за претседателот на партијата Зоран Заев да го добие мандатот за нова влада.
„Синоќа знам дека раководството на ДУИ донесе одлука да ги обезбедат потписите и да ги дадат, поради тоа што како второрангирана партија бевме условени од претседателот на државата Ѓорѓе Иванов да обезбедиме потписи за да ни биде даден мандатот, а по нашиот Устав тој треба да го даде веднаш мандатот. Сега се веќе обезбедени потписите за давањето на мандатот, јас верувам дека остануваат мал дел од преговорите околу формирањето на Влада, заради тоа што најзначајните прашања, а тоа се идната Владина програма, Платформата на социјалдемократите, Платформата на албанските политички партии, Законот за употреба на јазиците… се усогласени. Тоа беа суштествените работи, останува да седнеме со претседателите на другите партии да се договориме за ресорите, за кадрите во делот на владата, и верувам дека за некои 10-15 дена Македонија ќе има нова влада, предводена од социјалдемократите“, изјави Зоран Заев на прес-конференција во Сараево, по повод доделувањето на наградата за најдобар градоначалник во Југоисточна Европа.
Османи истакна дека со СДСМ во овој период одржале повеќе работни средби на кои разговарале за сите прашања.
„Главен столб на тие разговори беше услогласувањето по текстот на Законот за употреба на јазиците. Досега работните групи работеа по текстот што го сработи ДУИ, во соработка со другите партии од Платформата и по давање мислења, усогласување, надминување на евентуални разлики, вчера Претседателството го усвои текстот на тој Закон којшто ние го предложивме до СДСМ, како текст за заедничко услогласување, со цел усвојување во Собрание“, изјави Османи, дополнувајќи дека е завршена една важна фаза од процесот.
Тој истакна дека воопшто не се разговарало за менување на Уставот и на химната и знамето.
„Не стана збор за прашања што бараат промена на Уставот. Вакви прашања ги надминуваат односите помеѓу две партии. За тоа мора да има дијалог меѓу заедниците“, рече Османи.