коментира: ЏАБИР ДЕРАЛА
Како беше она келнерското? АПП… Ако пројде, пројде. Така и Програмскиот совет на МРТВ. Тргнаа да го менуваат директорот на МРТВ, иако доаѓа од редовите на партијата која има доминантно влијание во ова тело, за да постават уште попослушен, по нивниот вкус.
Да се потсетиме (не дека не пишувавме веќе), Програмскиот совет реши да распише конкурс за нов директор и заменик-директор на МРТВ. Целта беше да се казни сегашниот директор, Марјан Цветковски, поради недоволна партиска агилност, а воедно и да си обезбедат директор со мандат кој ќе биде тешко да се прекине и со следниот состав на Програмскиот совет на МРТВ. Со еден удар, две муви.
Треба да се забележи дека ваквото самоволно дејствување на Програмскиот совет на МРТВ, освен партиската мотивација, е овозможена и поради неажурноста на парламентот. Таму, во бирократските коридори, заглави процедурата за избор на нов состав на управниот одбор на градинката Весела телевизија, пардон, на националната радиотелевизија. Ни прво, ни последно… А МВРО, пак, си ја знае „работата“, ја користи секоја дупка, за да посади некој свој интерес.
За среќа, екипата на 360 степени заврши одлична работа, ги откри намерите и ја алармира јавноста за противзаконската постапка. Прво, „360 степени“ ја објави веста и изјавата на универзитетскиот професор Борче Давитковски. Професорот по управно право веднаш ја дисквалификува постапката како незаконска, затоа што со Законот за аудио и аудиовизуелни медиумски услуги им е продолжен мандатот на директорот и заменик-директорот на МРТ до изборот на нов Програмски совет.
Можно ли е, навистина, иницијаторите на постапката да не знаеле дека кршат закон? Излишно прашање, бидејќи во случајов не се работи за познавање на законите, туку за обид да се задржи контролата врз јавниот сервис по секоја цена. Законите во тој контекст постојат само да се заобиколат и изиграат.
Како и да е, допрва ќе биде тешко да се состави Програмски совет во црната висококатница, затоа што за тоа е потребно двотретинско парламентарно мнозинство. Но за сега, благодарение на реакцијата во јавноста, поттикната од 360 степени, Програмскиот совет се откажа од скандалозните намери. Со други зборови, фатени живи и осуетени. Барем за сега, МРТВ останува поштедено од дополнителна партизација.
Сега, откако се осуетени, тие што се обидоа да извршат политичка диверзија во МРТВ треба да си поднесат оставка. Од пристојност, ако не поради друго.
Сите права се задржани. ЛИНК: Услови за користење, авторски права и заштита на приватноста. Текстот е личен став на Авторот.
