По денешните завршни зборови на судењето за „Диво Насеље“, адвокатот Насер Рауфи во за ЦИВИЛ Медиа зборува за доказите, пропустите и опструкциите во случајот.
„Очигледно е дека се работи за сценарио на тајните служби, на бившиот директор, раководството, безбедностите структури, УБК, БЈБ, министерката за внатрешни работи… Овој предмет е практично реализиран од тие безбедносни структури, а сè со цел да се дефокусира јавноста“, рече Рауфи.
Потсетувајќи на политичката атмосфера во тој период, Рауфи вели дека, иако целта на бившиот режим била дефокусирање на јавноста, сепак, безбедносните служби морале превентивно да делуваат.
„Мислам дека имаше можност, и мораше безбедносните служби превентивно да дејствуваат. Тие моменти ние ги докажавме. Дури и регионални безбедносни структури, ги известиле македонските безбедносни структури дека групата влегува на територијата на Република Македонија, меѓутоа, ништо превентивно не е преземено“, истакна Рауфи.
„Практично, целото движење од самиот почеток е снимено со дрон, нивните фотографии се проследени до специјалните единици, што значи дека од самиот почеток се знаело и каде ќе бидат и со какво оружје располагаат. Ние имаме докази дека сите биле запознаени, но ништо не е преземено до моментот кога очигледно требаше да се дефокусира јавноста. Овој настан е практично наместен за целите на бившиот режим… Ние и во завршните зборови се повикуваме на доказите кои ги имаме, па се повикуваме дури и на доказите на самото Jавно обвинителство, од кои произлегува дека самата акција е надвор од полициските правила и позитивните прописи, надвор од Законот за полиција.
Тоа е една стихијна акција, за која ќе мора да се преземе одговорност од раководните структури, бидејќи се пратени млади луѓе, кои, за жал, се убиени без да знаат воопшто каде одат и зошто одат. Испратени се со еден краток брифинг од две-три минути, што не е според правилата. Една таква акција мора да се подготви, а тоа не е направено, па затоа и имаме вакви последици… Јас не сакам да тврдам дека тие последици се посакувани од нашите безбедносни структури, но поради брзината и аматерското постапување, имаме вакви страшни последици“, вели Рауфи за ЦИВИЛ Медиа.
Во завршните зборови на денешното судење, Рауфи ја обвини Управата за безбедност и контраразузнавање дека направила селекција на прислушуваните разговори и сокрила дел од доказите кои се од клучно значење за случајот.
Тој, исто така, посочи дека во овој судски процес се изоставени клучни докази, како разговори со високи политички и полициски структури, за кои самите обвинети признале дека постојат.
Рауфи побара и да се обезбеди телефонски разговор меѓу сега убиениот Мирсад Ндрецај и лидерот на ДУИ, Али Ахмети.
И ова судско рочиште за Диво Насеље помина со бојкот од дел од обвинетите. Тие посочија дека ќе останат во судница само кога спроти нив, ќе седи обвинител од Специјалното јавно обвинителство и тој ќе постапува во овој случај.
На минатите рочишта, Обвинителството, образложувајќи ги доказите, побара од судот обвинетите да бидат огласени за виновни бидејќи, како што посочи обвинителот Наум Паноски, постојат цврсти докази дека е сторено кривичното дело тероризам, а за висина на казната, Обвинителството остави да одлучи судот.
Судењето продолжува во понеделник со завршен збор на останатите обвинети и нивните бранители.
Во судскиот процес за случајот Диво Насеље, на 37 обвинети им се суди за тероризам и терористичка организација. Во нападите на 9 и 10 мај, 2015 загинаа осуммина припадници на МВР , а околу четириесетина беа повредени.
Насер Рауфи е член и дел од експертскиот тим на Комитетот за заштита на правата, кој во сабота ќе организира конференција на тема „Враќање на одземената правда“, чија цел се реформи на правосудството со кои ќе се елиминира можноста кој било да се обиде масовно да ги крши правата на граѓаните.
Комитетот се залага за ревизија на сите случаи за кои постои сомнеж дека се политички монтирани, како што е случајот Диво Насеље, како и за правата на жртвите на политичкиот прогон.
Маја Ивановска
Камера: Дехран Муратов
