По повод 7 Мај – Денот на полицијата, редакцијата на ЦИВИЛ Медиа на Фејсбук го постави ПРАШАЊЕТО НА ДЕНОТ: Колку ѝ верувате на полицијата?, а реакциите од граѓанките и граѓаните отворија лавина од критики, разочараност и револт кон состојбите во безбедносниот систем.
Во најголем дел од коментарите доминира недоверба во полицијата, при што граѓаните зборуваат за корупција, политички притисоци, селективна правда и нефункционален систем.
„Корумпирани се сите од полицаец до началник… багра… барем 80%. Полуписмени партиски војничиња“, гласи еден од коментарите.
Друг граѓанин споделува лично искуство:
„Воопшто не верувам, имам конкретно лично искуство кое покажа дека полицијата е искорумпирана.“
Во повеќе реакции се повторува ставот дека полицајците се под политички притисок и дека не можат самостојно да постапуваат.
„И полицајците не се виновни бидејќи им се врзани рацете и не можат да постапуваат по закон. Што и да превземат, повисоките старешини тоа го блокираат по партиски или пријателски линии.“
Граѓаните остро реагираат и на, како што велат, нееднаквата примена на законите.
„Ако не беше така, законите за сообраќајни прекршоци ќе се спроведуваа без пардон за сите исто. Вака – не верувам во полицијата.“
Дел од коментарите ја опишуваат државата како систем во кој криминалците се заштитени, а институциите немоќни.
„Законот е прецизно направен за криминалците! Која демократија… ова е класична анархија!“
Сепак, меѓу бројните критики, има и реакции во кои се прави разлика меѓу чесните полицајци и раководните структури.
„Секоја чест на луѓето што се нафатиле да носат униформи.“
„Има квалитет, само не можат да просперираат од корумпираните.“
Некои од граѓаните сметаат дека довербата во полицијата е речиси идентична со довербата во судството.
„Колку и на судството – нула.“
Други, пак, велат дека сè додека институциите се партизирани, државата ќе продолжи да тоне.
„Полиција и војска не се пипаат. Сѐ додека е партиски, сѐ повеќе ќе тонеме. Кој разбрал – разбрал.“
Наместо честитки за Денот на полицијата, коментарите се претворија во силен јавен сигнал за незадоволството од состојбите во безбедносниот систем и функционирањето на правната држава.
Б. Ј.
