ПРАШАЊЕ НА ДЕНОТ: Што мислите за состојбата на меѓуетничките односи во земјава? што ЦИВИЛ го постави на Фејсбук, предизвика голем број реакции, коментари и различни гледишта од граѓаните. Иако ставовите се разликуваат, во најголем дел од коментарите провејува заедничка оценка дека главниот извор на тензии не се обичните луѓе, туку политичките елити и партиските структури.
„Најголеми проблеми прават неуспешните политичари. Само бараат начин да го скараат народот и потоа да профитираат од тоа“, пишува еден од учесниците во дискусијата.
Сличен став имаат и други граѓани кои сметаат дека меѓуетничките односи меѓу обичните луѓе се далеку подобри отколку што се прикажува во јавноста.
„Лично мислам дека меѓу народот нема никаков проблем. Проблемот е во политичарите. Луѓето си се нормални, проблем е што ги водат ненормални политичари“, наведува еден коментатор.
Повеќе граѓани оценуваат дека национализмот и етничките поделби се користат како политичка алатка за мобилизација на гласачите и за одвлекување на вниманието од реалните проблеми.
„Џабе не рекле – скарај па владеј. Политичарите ќе нè скараат по национална основа, а тие меѓу себе си го тераат бизнисот и се богатат“, гласи еден од коментарите.
Дел од учесниците во дискусијата предупредуваат дека постојаното поттикнување на етнички теми во медиумите и политичкиот простор создава непотребни тензии и омраза.
„Секој ден на сите канали само се контрираат и носат омраза. Треба повеќе да се слушаат луѓе од сите националности, а не постојано истите личности кои ги знаеме по нивните поделби“, смета еден граѓанин.
Во коментарите може да се забележат и спротивставени ставови за положбата на етничките заедници во државата. Некои сметаат дека постои нерамнотежа во правата и политичкото влијание, додека други предупредуваат дека токму таквите наративи дополнително ги продлабочуваат поделбите.
Во некои коментари се посочува улогата на етничките партии во одржувањето на политичките тензии, како и ставови дека националистичките политики се пречка за вистинско општествено обединување.
„Со националистички партии нема можност за обединување и меѓуетничките односи се во хаос“, наведува еден од коментаторите, додека друг додава дека „меѓуетничките односи на обичните граѓани се на исклучително високо ниво, а проблемот е во меѓупартиските конфликти“.
Меѓу бројните реакции се издвојуваат и повици за поголема граѓанска свест и надминување на етничките поделби.
„Треба да се освести целиот народ дека постојат само Човек и Нечовек“, гласи една од пораките што доби поддршка од дел од учесниците во дебатата.
Дискусијата покажува дека граѓаните имаат различни перцепции за состојбата на меѓуетничките односи, но значителен дел од нив се согласуваат дека политичките пресметки и партиските интереси имаат големо влијание врз создавањето и одржувањето на тензиите во општеството.
Б. Ј.
