Во објава од 11 јануари на порталот на Срби.орг.мк, Организацијата на Србите во Македонија „Спона“ го прогласи Ѓорѓи Пулевски за „Српски родољуб“, кој молел за помош во Белград. Истовремено, македонскиот јазик (тогаш забранет за употреба) го прогласува за дијалект (најверојатно според нив на српскиот јазик) кој подоцна станува (очигледно на нивна голема жал) македонски книжевен јазик.
Со реакција на објавата на „СПОНА – Српски културно информативни центар“ преку соопштение за јавност се јави и месната заедница Галичник ( МЗГ), која во името на секој еден Галичанец и секој Македонец сака да изрази сериозен протест за дрската и навредливата објава на Организацијата на Србите во Македонија Спона, која се однесува на великанот Ѓорѓија Пулевски.
Грабањето и крадењето на македонскиот национален идентитет со векови е „спорт“ кој го практикувале нашите соседи, а особено кога се работи за нешто што потекнува од центарот на македонската култура, уметност и столб на македонскиот национален идентитет – Галичник.
Според МЗГ, желбата да се присвои Ѓорѓија Пулевски останува само желба и за истата имаат разбирање. Големец како него ниту имале ниту ќе имаат. Останува и само желба бидејќи секој кој знае да чита ќе прочита:
„Народ се вељид људи који се од еден род и који зборувајед еднаков збор, и који живувајед и кои се другарад еден со други, и који имајед једнакви обичаји и песни и весеља, тије људите ји викајед народ, а место во које живувад народ, се вељид отечество од тои народ. Така и Македонциве се народ и местово њивно је Македонија, напишал Ѓорѓија Пулевски во Тријазичникот 1875 година.“
Од МЗГ велат дека немаат никаква потреба ниту да додаваме ниту да одземаме зборови на тоа што Пулевски напишал пред 150 години.
Изразуваме надеж дека ставот на „СПОНА – Српски културно информативни центар“ не е став на официјален Белград и не е став на пријателскиот српски народ кој има високо изградена свест дека туѓото не се р’чка, МЗГ очекува извинување од страна на СПОНА, како и од сите политичари кои се членови на оваа организација, стои во соопштението на месната заедница Галичник
Ѓорѓија (Ѓорѓи) Пулевски (1817, Галичник – 13 февруари 1893, Софија) е македонски писател на кратки дела, лексикограф, историчар и воен водач. Пулевски е автор на првата печатена македонска граматика и автор на еден од првите речници на македонски јазик. Тој ја започнува борбата за слобода на својот народ во втора половина на XIX век, истовремено учествувајќи во ослободителната борба и на другите балкански народи. Особено е значајна неговата културно-национална дејност како учебникар, лексикограф, граматичар, поет, фолклорист, етнограф и историчар. Негово првопечатено дело е Речник од четири јазика (или четиријазичник), објавено во Белград во 1873 година.
Тоа е всушност петјазичник, бидејќи во колоната на српскиот јазик дава лексички материјал од двата блиски, но сепак различни јазика: македонскиот и српскиот.
Втората објавена книга на Пулевски е Речник од три јазика (тријазичник), објавена исто така во Белград во 1875 г. Ова дело е особено значајно поради јасната концепција и отворено изнесената идеја за татковината Македонија, за македонскиот народ и македонскиот јазик како посебни во словенскиот свет.
Д. Мишев
