Неколку десетици илјади луѓе се собраа во Белград на голем протест против популистичкиот претседател на Србија, Александар Вучиќ и неговата влада, чие цврсто владеење беше оспорено со неколкунеделните протести предводени од студентите, пишува Јутарњи лист.
Собирот во Белград, кој го организираа студентите, започна со 15-минутно молчење во чест на 15-те загинати, а меѓу присутните имаше земјоделци, актери и други граѓани од цела Србија.
Демонстрантите го окупираа плоштадот Славија и го блокираа речиси целиот центар на градот. Тие побараа оставка од премиерот Милош Вучевиќ и градоначалникот на Нови Сад по несреќата, како и кривично гонење на одговорните.
Студентите бараат и лицата кои ги нападнаа на претходните протести да се гонат кривично и да се повлечат обвиненијата против нивните колеги кои учествуваа на митинзите.ž
„Јутарњи лист“, како што пренесува Данас, посочува на податоци од Архивот на јавните собири, кој врз основа на достапните снимки и фотографии утврди дека на протестот се собрале меѓу 100.000 и 102.000 луѓе.
Од друга страна, посочуваат, неверојатна е оценката на МВР на Вучиќ, кое претходно соопшти дека на средбата во Белград присуствувале од 28.000 до 29.000 граѓани.
Слободна Босна протестите во Белград ги оценува како импресивни. Во текстот со наслов „НАРОДОТ СЕ КРЕНА ПРОТИВ ВУЧИЌ: Славија е преполна, импресивна сцена од протестот“ оценуваат дека се наликува на „Евромајдан во Кијив 2014. Прашање е само дали Вучиќ ќе заврши како Башар Ал Асад во Сирија “.
Реката од народ од сите страни течеше кон Славија, па беше преполна во моментот кога требаше да започне протестот. Импресивно, пишува сараевскиот портал.
Црногорски Вијести пишува дека толпата претходно извикувала: „Рацете ти се крвави“, „Вучиќ, оди си“, а по 15-минутниот молк настанала врева, односно настап со кој демонстрантите го изразиле своето незадоволство.
Учениците кои се движеа кон плоштадот развиориле транспарент: „Државата е сопственост на децата“, забележува црногорскиот портал, потсетувајќи дека пред неколку дена висок функционер на СНС, Владимир Ѓукановиќ, изјавил дека децата до полнолетството се сопственост на државата, што предизвика бурни реакции во јавноста.
И македонските медиуми пренесуваат за масовниот протест во Белград. Најсподелуван наслов на македонските медиуми „(Видео) Српската полиција: На протестот имаше помалку од 30.000 луѓе; Архивата на јавните собири: Имаше 2-3 пати повеќе“ е преземен од агенцијата Макфакс, и во текстот се наведуваат податоците за посетеноста на протестот според информациите од српското МВР и Архивата на јавните собири.
Медиумот на албански јазик Бота Сот на своите страници пренесува за масовниот протест против Вучиќ и неговата влада во Белград организиран од студентите и синдикатите на земјоделците, кој дел од поширокото движење кое бара одговорност за уривањето на покривот на железничката станица во Нови Сад, во кој загинаа 15 лица на 1 ноември, за што многумина во Србија за катастрофата ја обвинуваат распространетата корупција и лошата изработка на зградата на железничката станица, која беше реновирана двапати во последниве години како дел од сомнителните проекти во кои се вклучени кинески државни компании, информира порталот.
Драган Мишев
