Шефот на Делегацијата на ЕУ во земјава Михалис Рокас, одговорајќи на новинарско прашање за време на неговата посета на Тетово истакна дека процесот на проширување е врвен приоритет на Европската Унија. Правиме напори да заврши процесот на реформи во Северна Македонија и што побргу да се постигне целта, земјата да стане членка на ЕУ, изјави денеска
Тој посочи дека во моментот во тек се повеќе дипломатски активности во врска со ова прашање, потенцирајќи дека новото раководство на ЕУ прави многу напори за Северна Македонија да стане дел од европското семејство.
-Во моментот во тек се многу дипломатски активности во врска со ова прашање. Премиерот на Северна Македонија беше во посета на Брисел каде што се сретна со новото раководство на ЕУ, а следната недела, на 18 декември, ќе има уште една можност да го посети Брисел, во рамките на Самитот на ЕУ и земјите од Западен Балкан. Јас мислам дека од страна на новото раководство на ЕУ е јасно кажано дека процесот на проширување е врвен приоритет, вклучително и со Северна Македонија. И Делегацијата на ЕУ прави огромни напори да заврши процесот на реформи за Северна Македонија и таа да стане членка на ЕУ. Каква било друга дополнителна поддршка или дипломатски активности се повеќе од добредојдени, рече Рокас.
Исто така, во одговор на новинарско прашање во врска со најновото апдејтирање на црната листа на САД, Рокас изјави дека Европската унија ги забележала санкциите на САД за поранешниот вицепремиер Артан Груби и апелацискиот судија Енвер Беџети, кои беа ставени на црната листа поради нивната вклученост во коруптивни активност како и дека независноста на судството е клучна за евроинтегративниот процес на земјата и за справувањето со корупцијата.
„Тука можам да ја споменам оценската мисија на ЕУ, која што издаде 40 препораки за судството во Северна Македонија, така што мислам дека најважно е судството да стане независно тело. Професионално и независно судство останува клучен приоритет за идниот интегративен процес на Северна Македонија во ЕУ. Со постоење на независно судство, ќе се зголеми довербата во општеството и се надеваме дека ова ќе се случи многу поскоро“, изјави Рокас денес од Тетово.
На прашањето во врска со претресите кои се случуваат во Судскиот совет, Рокас истакна дека ЈО треба да има можност да ги направи сите можни пребарувања во случаи кога постојат сомневања за постоење на корупција во одредена институција.
Без разлика дали станува збор за индивидуални или општи акти, во едно демократско општество на Јавното обвинителство треба да му бидат ставени на располагање сите механизми за да може да изврши истрага за можна корупција“, изјави Рокас при денешната посета на Тетово.
М. Д.
