Опозицискиот руски политичар Владимир Кара-Мурза, кој се соочува со потенцијална затворска казна од 25 години, изјави денеска пред московскиот суд дека неговото судење потсетува на Сталиновите процеси во 30-тите години од минатиот век. Кара-Мурза е 41-годишен татко на три деца и поранешен новинар со руски и британски пасош, кој поминал години спротивставувајќи се на политиката на претседателот Владимир Путин и лобирајќи кај странските влади и институции да воведат санкции против Русија и некои Руси за наводни кршења на човековите права.
Во четвртокот руските државни обвинители побараа за него 25 години затвор. Кара-Мурза е обвинет за предавство и дискредитација на руската војска, откако ја критикуваше, како што Москва ја нарекува „специјалната воена операција“ во Украина. Пресудата за опозицискиот политичар се очекува на 17 април, а судењето се одвива зад затворени врати. Копија од неговото последно обраќање до судот беше денеска јавно доставена од неговата сопруга и адвокатот.
«Даже сегодня, даже в окружающей нас темноте, даже сидя в этой клетке, я люблю свою страну и верю в наших людей. Я верю, что мы сможем пройти этот путь»
Последнее слово Владимира Кара-Мурзы в суде, 10 апреля 2023 года. pic.twitter.com/5wEuk4XsHJ
— Vladimir Kara-Murza (@vkaramurza) April 10, 2023
Кара-Мурза одбива да побара од судот да го ослободи, повторува дека стои зад неговите зборови и дека е горд на нив.
Сегашниот период, вели Кара-Мурза, не наликува толку на 70-тите, кога државата се соочуваше со советските дисиденти, туку на 30-тите, кога Сталин ги водеше своите судења како претстави за да ги спроведе чистките на своите противници. „За мене како историчар, тоа е поттик за размислување“, истакна Кара-Мурза.
Криминалците треба да се покаат за тоа што го направиле. Јас, пак, сум во затвор поради своите политички ставови. Знам дека ќе дојде ден кога ќе исчезне темнината над нашата земја, рече тој.
Набргу по почетокот на инвазијата на Украина, Русија воведе закони за цензура со цел да се задуши отпорот во општеството. Според нив, „дискредитирањето“ на армијата може да се казни со до пет години затвор, додека за намерно ширење лажни информации за војската може да се добие казна затвор од 15 години.
Претходно денеска, десетици руски новинари и активисти за човекови права, од кои многумина ја напуштија земјата, ги повикаа властите да го ослободат Кара-Мурза, велејќи дека обвиненијата против него се неосновани и политички мотивирани.
Гонете убијци и криминалци, а не чесни и одговорни граѓани кои се осмелуваат да мислат и да ја зборуваат вистината. Запрете го новиот пад на Русија кон сталинизмот и тоталитаризмот, се наведува во нивното писмо.
Г. Т.
